Գրքեր
15 Փետրվար, Ուր, Առաջավորաց պահքի Ե օր Սուրբ Հովնան մարգարեի հիշատակության օր

Հին կտակարանում անունով և հայրանունով է հիշատակվում Հովնան մարգարեն՝ «Նա (Իսրայելի Հերոբովամ Բ թագավորը) Իսրայելի սահմանները՝ Եմաթի մուտքից մինչև Արաբածովը ապահով դարձրեց, ինչպես իր ծառա Գեթաքոբերացի Ամաթի որդի Հովնան մարգարեի միջոցով ասել էր Տեր Աստվածը» (Դ Թագ. 14:25): Հարց է ծագում, թե արդյո՞ք այս գիրքի հեղինակը մարգարեն ինքն է, թե մի ուրիշ անձ է, որը մարգարեի պատմությունը մեզ է ներկայացնում: Ոչ մի նշան չկա, որ գրքի հեղինակը Հովնան մարգարեն է եղել. այլապես ինքը լինելով ժամանակակից Ամովս մարգարեին, 8-րդ դարի առաջին կեսերը  Ք.Ա., նրա հետ առաջին գրող մարգարեներից մեկը պիտի լիներ: Առհասարակ այնպես է համարվում, որ այս գիրքը գրվել է Իսրայելի գերությունից հետո՝ Ք.Ա. 5-րդ դարում:

Այս գիրքը մարգարեական մյուս գրքերից տարբերվում է նրանով, որ պատգամներ պարունակելու փոխարեն, պատմում է մի մարգարեի արկածները, որին հանձնարարվում է ամենատհաճ պարտականությունը՝ ապաշխարություն քարոզելու Իսրայելի համար ամենաատելի ժողովրդի մայրաքաղաքի բնակիչներին՝ Նինվեացիներին:

Հետևաբար զարմանալի չէ, որ Հովնանը նախ փորձում է խուսափել այս պարտականությունից, բայց ի վերջո համակերպվում է Աստվածային հրամանի հետ, այն հույսով, որ ամենայն հավանականությամբ Նինվեն չպիտի ապաշխարի և հետևաբար պիտի կործանվի: Բայց առաջին զարմացողը ինքն է լինում, երբ նինվեացիները անսում են նրա քարոզչությանը, որը բաղկացած է հինգ բառերից՝ «Երեք օրից Նինվեն պիտի կործանվի»: Նրանք զղջում, ապաշխարում և դարձի են գալիս և Աստված խնայում է նրանց:

Գրքի նպատակը շեշտելն է, որ Աստված Տեր և հոգածու է հեթանոսներին այնքանով, որքանով որ Իսրայելին: Պատժում է մեղքը որտեղ էլ լինի՝ Իսրայելի կամ հեթանոսների մեջ: Խնայում է ապաշխարողին, ուր որ էլ պատահի, Իսրայելի մեջ կամ հեթանոսների մոտ:

Այս առումով առակի ձևով գրված և առակի նպատակ ունեցող այս գիրքը ամենամոտն է Նոր Կտակարանյան ուսուցմանը, որը հաստատում է, որ Աստված «Իր արեգակը ծագեցնում է չարերի և բարիների վրա, անձրև է տեղում արդարների և մեղավորների վրա» (Մատթ. 5:45)

Մենք Հովնանին «Երկոտասան մարգարեներ»-ի հետ հիշատակելուց բացի, հիշատակում ենք նրան և նրա ապաշխարության քարոզչությունը Առաջավորաց Պահքի ուրբաթ օրը:

 

«Աստվածաշնչյան Սրբեր» Շնորհք արքեպս. Գալուստյան, «ԳԱՆՁԱՍԱՐր» մատենաշար, Երևան 1997 

Արևելահայերենի փոխադրեց Վաչագան սրկ. Դոխոլյան

ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․