Գրքեր

Աղոթքի ուժը

Նավաբեկությունից միայն երկու տղամարդ կարողացան փրկվել և լողալով մի անմարդաբնակ կղզի հասան: Նրանք որոշեցին, որ Աստծուն աղոթելուց և Նրանից օգնություն խնդրելուց բացի այլ ելք չունեն: Սակայն որպեսզի իմանան, թե ում աղոթքն է ավելի զորավոր, որոշեցին կղզին երկու մասի բաժանել և առանձին տարածքներում մնալ:

Առաջին հերթին, իհարկե, ուտելիքի համար աղոթեցին: Առավոտյան նրանցից մեկը մի պտղատու ծառ գտավ իր տարածքում և կարողացավ քաղցը հագեցնել: Իսկ մյուսն իր տարածքում չգտավ:

Առաջին ճամփորդը, որ ծառը գտավ, շատ էր տանջվում միայնությունից, ուստի մի քանի օր անց սկսեց ջերմորեն աղոթել կյանքի ընկեր գտնելու համար: Շուտով ևս մեկ նավաբեկության հետևանքով ողջ մնացած մի կին լողալով հասավ այն ափը, որտեղ այդ մարդն էր: Տղամարդն անասելի երջանիկ էր և շնորհակալ Աստծուն, որ իր երազանքը կատարվեց:

Իսկ կղզու հակառակ կողմում իրավիճակը նույնն էր՝ ոչ ուտելիք կար, ոչ կին:

Առաջին մարդը, որն արդեն միայնակ չէր, սկսեց Աստծուց տուն խնդրել, հագուստ ու տարբեր կերակուրներ: Հաջորդ օրն իսկ, ասես հրաշքով, ունեցավ այդ ամենը: Դե իսկ մյուսի մոտ ամեն ինչ նույնն էր:

Որոշ ժամանակ անց ճամփորդներից առաջինը սկսեց խնդրել Աստծուն, որ մի նավ ուղարկի իրենց, որպեսզի կարողանան ինքն ու կինը լքել կղզին: Հաջորդ օրը մի շքեղ ու արագընթաց նավ հայտնվեց կղզու ափերի մոտ: Նրանք շտապով հավաքեցին իրենց իրերն ու սկսեցին բարձել նավի վրա: Երկրորդ ընկերը, սա տեսնելով, թույլտվություն խնդրեց նրանց հետ նավ բարձրանալ ու հեռանալ կղզուց: Բայց առաջինը չէր պատրաստվում փրկել նրան և որոշեց կղզում թողնել, քանի որ համարում էր, որ նա արժանի չէ Աստծո օրհնությունից օգտվելու, որովհետև ի տարբերություն իրեն՝ իր աղոթքների պատասխանը չէր ստացել: Բայց երբ արդեն նավը շարժվում էր, երկնքից մի ձայն լսեց, որ ասում էր.

- Ընկերոջդ ինչո՞ւ քեզ հետ չես վերցնում:

- Որովհետև նրա աղոթքները լսելի չեղան և նա ոչ մի բանի արժանի չէ,- պատասխանեց մարդը:

- Չարաչար սխալվում ես,- ասաց ձայնը,- ընկերդ միայն մեկ աղոթք ուներ և ես ընդունեցի այն: Նա միայն մեկ բան էր խնդրում, որպեսզի երկուսիդ բոլոր աղոթքներն ընդունելի լինեն:

 

Ահա թե ինչպիսի ուժ ունի ուրիշի համար արված անկեղծ աղոթքը:




Ռուսերենից թարգմանությունը՝ Էմիլիա Ապիցարյանի

09.04.23
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․