Գրքեր

«Աղոթում եմ բոլոր մայրերի համար»

Ամեն տարի՝ ապրիլի 7-ին, Հայ Առաքելական Սբ. եկեղեցին նշում է Ավետումն Սբ. Մարիամ Աստվածածնի տոնը: Ավետման տոնը Ն.Ս.Օ.Տ.Տ. Գարեգին Բ Ամենայն Հայոց կաթողիկոսի կողմից հռչակվել է որպես մայրերի և մայրության բերկրանքին սպասող կանանց օրհնության օր: Այդ օրը բոլոր եկեղեցիներում Սբ. Պատարագ է մատուցվում և մայրության բերկրանքին սպասող կանանց օրհնության կարգ է կատարվում: Եկեղեցական անշարժ այս տոնն էլ հիմք ունենալով՝ պետության կողմից հաստատվել է մայրության և գեղեցկության տոնը:

Տոնական այս օրը «Դալան» ցուցասրահում նկարչական յուրահատուկ մի ցուցահանդես էր կազմակերպվել, որ կրում էր «Մանուկները մայրիկներին» խորագիրը: Ժամանակակից արվեստում ստեղծագործող նկարիչների երեխաները և թոռնիկներն իրենց նկարներով անակնկալ էին պատրաստել տատիկներին ու մայրիկներին:

Իսկ մինչ անակնկալը, նկարչական ցուցահանդեսի բացմանը, ԱՀԹ առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանի օրհնությամբ, հանդես եկավ Զորավոր Սբ. Աստվածածին եկեղեցու «Զորավոր մանկունք» երգչախումբը: Նրանք կատարեցին «Զարթիք փառք իմ», «Բազում են քո գթութիւնքդ» շարականները, «Սբ. Ծննդյան ավետիս» շարականի երկու մշակումներ, նաև կոմիտասյան մշակմամբ «Մեր դռանը խնկի ծառ», «Սոնա յար», «Ալագյազ» և «Զար զընգը» ժողովրդական երգերը: Նախքան ելույթը, երգչախմբի գեղարվեստական ղեկավար Գոհար Հարությունյանը ներկայացրեց երգչախմբի գործունեությունը՝ անդրադառնալով նաև հոգևոր ու ժողովրդական երգի դերին և նշանակությանը երեխաների դաստիարակության հարցում:

«Զորավոր մանկունք»-ի անկեղծ և անկաշկանդ կատարումներն անկախ տարիքից գրավել ու հիացրել էր ունկնդիրներին:

«Զորավոր մանկունք» երգչախմբի անդամներից Քոչարյան Մարիամը (11 տ.) շատ լավ գիտի, որ Աստվածամորը նվիրված յոթ տոներն իր անվանակոչության օրերն են, իսկ ապիրլի 7-ին նա կրկնակի առիթ ուներ նշելու. «Աղոթում եմ բոլոր մայրերի համար, իմ մեծ ցանկությունն է, որ բոլոր մայրերը միշտ ուրախ լինեն, ժպիտը չպակասի նրանց դեմքից և երբեք չհանդիպեն անհաջողությունների»:

Խրիմյան Հայրիկը մորը համարում է ընտանիքի թագուհի. «Տունն ու ընտանիքը մի փոքրիկ թագավորության երկիր ու սահման են, որի նահապետական աթոռի վրա նստում են ծնողները. հայրն՝ իբրև թագավոր, մայրն՝ իբրև թագուհի, ու կառավարում են հպատակ ընտանիքը: Այս ընտանեկան պալատում և թագավորությունում ո՛չ ոստիկան կա, ո՛չ սուր, ո՛չ բռնություն, ո՛չ գավազան. ամեն տեղ հայրական սեր ու մայրական գորով է, դաստիարակողն ու խրատողը՝ ծնողների կենդանի օրինակը»:

 

 

Կարինե Սուգիկյան

07.04.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․