Գրքեր

Ահա, թե ինչ է նշանակում սիրել

Երկրորդ համաշխարհային պատերազմից մի քանի տարի առաջ մի հրաշալի ամուսնական զույգ էր ապրում: Նրանք միմյանց շատ էին սիրում: Ամուսինը փորձում էր ամեն առիթով իր սերն արտահայտել կնոջը: Իսկ նա գեղեցիկ էր, զգայուն և թույլ առողջություն ուներ: Բայց ահա, սկսվեց պատերազմը, և ամուսինը մեկնեց ճակատ: Այնտեղ նա բազում դժվարին փորձությունների միջով անցավ, սակայն ամեն անգամ հրաշքով ողջ մնաց: Նա ամեն օր աղոթում էր Աստծուն, որպեսզի ողջ-առողջ տուն վերադառնա՝ կնոջ մոտ, որին այնքան սիրում էր: Երբ պատերազմն ավարտվեց, նա, երջանկությունից խենթացած, թևեր առած, տուն վերադարձավ: Գյուղն արդեն երևում էր, երբ ճանապարհին ընկերոջը հանդիպեց: Երբ միմյանց տեսնելու ուրախությունը հանդարտվեց, ընկերը սկսեց մխիթարել նրան՝ խոսելով բաժին հասած ինչ-որ փորձության մասին: «Ինչի՞ մասին ես խոսում»,- սրտատրոփ հարցրեց ամուսինը: «Ի՞նչ է, ոչինչ չգիտե՞ս: Կինդ ծանր հիվանդ էր: Ապաքինվելն՝ ապաքինվեց, սակայն նրա դեմքն այժմ այլանդակված է»,- կարեկցանքով պատասխանեց ընկերը: Ամուսնու ծնկները դողացին, նա փլվեց գետնին և դառնորեն լաց եղավ: Եվ ահա, երեկոյան մոտեցավ իր տանը: Կինը, նրան տեսնելով, անչափ ուրախացավ և անդադար փառք էր տալիս Աստծուն, որ ամուսինը հրաշքով ողջ է մնացել և տուն վերադարձել: Իսկ հետո նրանք սեղան նստեցին… և կինը հանկարծ հասկացավ, որ իր այնքան սիրելի ամուսինը պատերազմի ժամանակ կորցրել է տեսողությունը: Մտածելով, որ նա վիրավորման հետևանքով է զրկվել տեսողությունից, ոչինչ չհարցրեց, որպեսզի ավելորդ ցավ չպատճառի նրան: Նախկինի պես հոգ տարավ ամուսնու մասին՝ որպես սիրող կին, և այդպես միասին երջանիկ ապրեցին ևս տասնհինգ տարի: Այնուհետև, այդ տասնհինգ տարվա երջանկությունից, նաև ծածուկ տառապանքից հետո, կինը հոգին Աստծուն ավանդեց: Իսկ սիրող ամուսինը փակեց նրա աչքերը… և բացեց իրենը: Այդ բոլոր տարիների ընթացքում նա կույր էր ձևացել, որպեսզի չբազմապատկի կնոջ տառապանքները: Ահա, թե ինչ է նշանակում սիրել:

 

Ռուսերենից թարգմանությունը՝ Էմիլիա Ապիցարյանի

21.01.24
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․