Արարչին փառաբանելու հերթական միջոցներից մեկը

Արարիչ Աստված արարչագործության պսակին՝ մարդուն, շնորհել է բանականություն և ազատություն, զարդարել նրան Իր պատկերով ու նմանությամբ՝ այդ կերպ ցույց տալով նրան այն բարձր կոչումը, որին նա կոչված է ի սկզբանե: Մարդու առաջին կոչումն Արարչին փառաբանելն է, հոգով Նրան ձգտելը և Նրա հետ միավորյալ կյանքից ուրախություն ապրելը: Ողջ արարչագործությանն Արարչին փառաբանելու տիեզերական կոչ է ուղղում սաղմոսերգուն (Սաղմ. 148): Աստծուն ճշմարտապես փառաբանելու համար՝ արարչագործության պսակը պետք է ջանա արժանի լինի իր Նախատիպին ու ապաշխարությամբ և բարի գործերով վերականգնել իր մեջ մեղքերի պատճառով խաթարված Արարչի պատկերն ու նմանությունը:

Եկեղեցու հայրերից՝ Երեմիա Այլոխինը, ասել է, որ գոհաբանությամբ լեցուն հոգին չի կարող ողորմած չլինել, չի կարող ատել և չարը մտածել, որովհետև հիշում է իրեն արված ողորմածությունը և ձգտում է հարյուրապատիկ վերադարձնել: Արարչին գործով փառաբանելու հերթական միջոցներից է եկեղեցու սոցիալական ծրագրերը, որի շրջանակում հոկտեբերի 20-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը, որպես սիրո և երախտագիտության արտահայտություն, Աթայան Էրային (49 տ.) փոխանցեց 100 000 դրամ, որ տրամադրել էր Զորավոր Ս. Աստվածածին եկեղեցու համայնքի անդամներից մեկը, ով չցանկացավ նշել իր անունը: Էրան իր ամուսնու և հինգամյա որդու հետ արցախյան վերջին պատերազմից հետո տեղահանվել է Հադրութից և այժմ վարձակալությամբ բնակվում է Երևան քաղաքի Ֆուչիկի 24 բն. 39 հասցեում: Էրայի ամուսինը՝ Ավանեսյան Կարենը (58 տ.), մասնակցել է արցախյան վերջին պատերազմին և հոկտեմբերի 15-ին Ֆիզուլիում ծանր վիրավորում է ստացել, ինչի հետևանքով անդամահատվել է նրա մեկ ոտքը: Յոթ վիրահատության է ենթարկվել և դեռ երկու վիրահատություն էլ պետք է անցնի: Ավանեսյան ընտանիքն իր երախտագիտությունը հայտնեց Տեր Գրիգորին և աջակից անձին:

Կարինե Սուգիկյան