25 Փետրվար, Գշ, Մեծ Պահքի Բ օր

Գրքեր

Արև երեխաների հրաշք Ամանորը

Դեկտեմբերի 23-ին ԱՀԹ առաջնորդարանի դահլիճում ամանորյա ուրախ տրամադրություն էր տիրում: ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, «Արև-երեխաներ» ՀԿ-ի նախաձեռնությամբ և «Ալ մայասս» ռեստորանի սեփականատեր Ռազմիկ Խաչատուրյանի աջակցությամբ՝ Արև երեխաներն ուրախ Ամանոր նշեցին: Սեր, ջերմություն և ժպիտ ճառագող Արև երեխաների ներկայությունը կրկնապատկել էր տոնական ուրախությունը: Երգ ու պար սիրող Արևներն ողջ ցերեկույթի ընթացքում պարեցին, նրանց ուրախ պարերին էին միացել ծնողները, Mickey ու Minnie Mouse մուլտհերոսները: Երեխաների ուրախ տրամադրությունը լրացրեցին Ձմեռ պապն ու Ձյունանուշը:

Այնուհետև Արև երեխաներին իր օրհնությունը բերեց ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանը: Ներկաները, Սրբազան Հոր գլխավորությամբ, «Տերունական աղոթք»-ն ասացին: Զորավոր Ս. Աստվածածին եկեղեցու հոգևոր հովիվ, «Արև-երեխաներ» ՀԿ-ի հոգաբարձուների խորհրդի նախագահ Տեր Գրիգոր քահանա Գրիգորյանն իր որդիական խոնարհումը բերեց և շնորհակալություն հայտնեց Սրբազան Հորը՝ նշելով, որ իր հայրական օրհնությամբ Զորավոր Ս. Աստվածածին եկեղեցու համայնքը «Արև-երեխաներ» ՀԿ-ի հետ համագործակցաբար փորձում է հնարավորինս օգտակար լինել Դաունի համախտանիշ ունեցող երեխաներին և նրանց ընտանիքներին՝ իրականացնելով սոցիալ-առողջապահական մի շարք ծրագրեր:

«Անչափ ուրախալի է, որ այսօր միմյանց հետ անմիջականորեն հաղորդակցվելու առիթն ունեցանք: Շնորհակալություն Տեր Հորը, ով համբերությամբ և սիրով իրականացնում է Դաունի համախտանիշ ունեցող երեխաների աջակցության վերաբերյալ աստվածահաճո այս ծրագիրը»,- ասաց Նավասարդ Սրբազանը:

«Արև-երեխաներ» ՀԿ-ն շնորհակալագրեր հանձնեց Սրբազան Հորը, ամանորյա միջոցառման աջակից Ռազմիկ Խաչատուրեանին  և Զորավոր Ս. Աստվածածին եկեղեցու համայնքին:

Արև երեխաների ուրախությամբ ոգևորված ծնողներն իրենց գոհունակությունը հայտնեցին «Արև-երեխաներ» ՀԿ-ին և աջակից ընտանիքին: Ծնողներից մեկն իր ուրախությունը կիսեց՝ ասելով. «Երեխաների ուրախությամբ մենք էլ մեծ ուրախություն ապրեցինք: Արև երեխաները հրաշք բալիկներ են, նրանք կարող են ամեն ինչ անել: Անգնահատելի աշխատանք է կատարում «Արև-երեխաներ» ՀԿ-ն, շնորհակալ եմ իրենց, Տեր Գրիգորին և վստահ եմ, որ ապագայում իրենց ջանքերի և մեծ աշխատանքների շնորհիվ, Արև երեխաներն իրենց հաջողությունը կունենան, կինտեգրվեն հասարակության մեջ՝ դառնալով նրա լիարժեք անդամը»:

Արև երեխաների ուրախությունն ավելի կրկնապատկվեց, երբ Ձմեռ պապի ու Ձյունանուշի կողմից նրանց նվերներ փոխանցվեցին: «Արև-երեխաներ» ՀԿ-ի և աջակից ընտանիքի

միասնական և սիրով լի ջանքն ու եռանդն իսկապես կարողացան Արև երեխաների օրը դարձնել տոնական և անմոռանալի:

 

Կարինե Սուգիկյան

23.12.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․