Գրքեր

Աշխարհամատրան կիրակիի քարոզ

«Եւ յայտնի իսկ մեծ է խորհուրդն Աստուածպաշտութեան. որ երևեցաւ մարմնով, արդարացաւ հոգւով, յայտնեցաւ հրեշտակաց, քարոզեցաւ ի հեթանոսս, հաւատարիմ եղեւ յաշխարհի և վերացաւ փառօք»:

«Եվ հայտնապես մեծ է Աստվածապաշտության խորհուրդը, որ հայտնվեց մարմնով, արդարացավ Հոգով, երևաց հրեշտակներին, քարոզվեց հեթանոսների մեջ, հավատալի եղավ աշխարհում և երկինք վերացավ փառքով» (Տիմոթեոս Ա 3:16):

Սիրելի՛ հավատավոր զավակներ Հայ Առաքելական Սուրբ Եկեղեցու.

Այսօր մենք տոնում ենք Աշխարհամատրան կամ Կանաչ կիրակին: Աշխարհամատրան կիրակի է կոչվում՝ ի հիշատակ առաջին քրիստոնեական եկեղեցու, իսկ կանաչ կիրակի անվանվում է՝ ի պատիվ կյանքի ու բնության հարության և զարթոնքի:

Սիրելինե՛ր, երկու շաբաթ է արդեն, որ մեր Տեր և Փրկիչ Հիսուս Քրիստոսի սուրբ հարության ավետիսով ցնծում է ողջ քրիստոնյա աշխարհը: Սա մի ուրախության և ցնծության ընթացք է, որ գալիս է հաստատելու Տիրոջ խոստացած պարգևների հավաստիությունը: Ինչպես որ քրիստոնյայի կյանքում ոչինչ պատահական և ինքնանպատակ չի լինում, այդպես էլ այս հիսունօրյա հարության օրերն են, որ իրենց նշանակությունն ու դերն ունեն մեզ համար, որ պատմում են մեզ Երկնային Արքայության ուրախության խնջույքի մասին: Հինունքի խաղաղության և անդորրի այս շրջանը, որ հաջորդել է ապաշխարության ընթացքին, հիշեցնում է մեզ, որ մարդը դատապարտված չէ հավետ մնալ տխրության և վշտի մեջ և դրանով մխիթարություն է բերում մարդկանց սրտերին:

Հարության ավետիսը ոգեշնչում է Քրիստոսի հետևորդներին, լուսավորում է նրանց ճանապարհը, գարնանային ջերմություն է հաղորդում և կանաչազարդում է մեր բոլորի կյանքը, շնչավորում և կենդանություն է պարգևում տիեզերքում ամենքին և ամեն ինչի, որովհետև մահը իր շնչով անզորանում է Քրիստոսի հարությամբ: Մարդկային մեղանչական ախտերի և մահվան շղթաները ի չիք են դառնում Քրիստոսի պարգևած փրկության և հարության շնորհներով: Աստծո Միածին Որդու խաչելությամբ և հարությամբ կատարվում է երկնքի ու երկրի հաշտեցումը: Մենք բոլորս էլ գիտենք, որ մարդն առանց Աստծո ոչինչ է և ունեզուրկ, մինչդեռ Քրիստոսի մարդեղությամբ, խաչելությամբ և հարությամբ հասկանում ենք, որ, անկախ ամեն ինչից, մարդը անտեսված չէ իր Արարչի կողմից, որ Աստծո սերը մարդու նկատմամբ անչափ է, և որ մեր Տերը Իր փրկագործ արյամբ ոչ միայն փրկություն է բաշխում մեզ, այլ նաև հավիտենական կյանքի խոստում է տալիս:

Սիրելինե՛ր, Քրիստոսի արյամբ է, որ հիմնահաստատվել է եկեղեցին, որի տոնն է այսօր: Քրիստոսի հարությամբ հիմնանորոգվում և վերածաղկում է առաքելահաստատ եկեղեցին, որպեսզի մարդկանց առաջնորդի դեպի փրկության նավահանգիստ: Այն երկիրը երկնքի հետ կապող կամուրջ է, որ մարդուն հաշտեցնում է Աստծո հետ, ինչպես նաև ապահովում է երկնային սնունդով:

Հարկ է, որ մարդն իր կյանքը ապրի եկեղեցում, եկեղեցու հետ միասին և եկեղեցու հարատև օրհնությամբ, որովհետև եկեղեցին Երուսաղեմի այն տաճարն է, որ կառուցվել է Աստծո փառքի համար: Եկեղեցին այն Ուխտի տապանակն է, որն իր մեջ է բովանդակում Աստծո պատվիրանները, և վերջապես եկեղեցին է, որ Նոյյան տապանի նման փրկում և պաշտպանում է մեզ աշխարհային ալեհույզ փոթորիկներից: Եկեղեցիների առկայությունը պետք է ուրախություն պարգևի մարդկությանը, քանի որ այնտեղ է, որ ամեն կիրակի պատարագվում է Հիսուս Քրիստոս՝ մեզ՝ մեղավորներիս փրկության համար: Այն երբեք ավելորդ կամ ժամանակավրեպ լինել չի կարող, որովհետև Աստված հավիտենական է, և մարդը մշտապես ունի Իր Երկնավոր Ծնողի կարիքը: «Ինչպես որ մայրն է գգվում իր մանկանը, այնպես էլ Ես պիտի գգվեմ ձեզ, և դուք պիտի մխիթարվեք Երուսաղեմում», – ասում է Տերը Եսայու մարգարեության մեջ (Եսայի 66: 13): Եվ իսկապես եկեղեցին մեզ համար մայրական գգվանքի նման է, որում խաղաղվում են մեր հույզերն ու ապրումները, և որ մեզ է փարվում՝ իր անդորրն ու մխիթարությունը տալով մեր հոգնաբեկ սրտերին: «Եկեք Ինձ մոտ, բոլոր հոգնածներդ ու բեռնավորվածներդ, և Ես ձեզ կհանգստացնեմ», – ասում է Հիսուս Քրիստոս (Մատթեոս 11: 28):

Եկեղեցին հաղթահարել է բազում փորձություններ, սակայն մշտապես կանգուն է մնացել, քանի որ Հիսուս Քրիստոս Ինքն է եկեղեցու գլուխը: Մենք չպետք է եկեղեցին դիտենք իբրև մեզանից անջատ ինչ-որ կառույց, այլ պիտի համարենք մեր տունը և մեզ էլ համարենք այդ տան անդամներից մեկը: Այն երկնային մի պարտեզ է երկրի վրա, ուր աճում են մեր հոգու համար բոլոր անհրաժեշտ պտուղները: Եվ այդ պտուղները անսպառ են: Ոչ մի մարդ, որ ցանկանա օգտվել այդ պտուղներից, անմասն չի մնա: Զարմանալին այն է, որ այդ պարտեզի պտուղները գերազանցում են մարդկության թվաքանակին, անհավանական կերպով նրանցից ավելի շատ են և սպասում են իրենց քաղողներին:

Եկեղեցին կանգուն է, ժամանակներն ու մարդիկ գալիս անցնում են, և շատ քչերն են, որ բացում են եկեղեցու պարտեզի դուռը, ցանկանում են մտնել այնտեղ և իրենց համար ստեղծված այն բարիքներից օգտվել, որոնք երկնային բարիքների համն ունեն և հիշեցնում են, որ այդ այգու Տերը իրենց համար էլ ավելի լավ պտուղներ ու բարիքներ է պատրաստել:

Սիրելի՛ հավատակից քույրեր և եղբայրներ, եկեք հիշենք Քրիստոսի պատմած հարսանեկան խրախճանքի առակը (Մատթեոս 22:1-14), երբ թագավորն իր որդու համար հարսանիք է անում և հրավիրում մարդկանց, որոնք տարբեր պատճառներով հրաժարվում են գալ: Դարձյալ ուրիշ ծառաներ է ուղարկում և ասում հրավիրվածներին. «Ահա իմ ճաշկերույթը պատրաստեցի. իմ զվարակները և իմ պարարտ անասունները մորթված են, ու ամեն ինչ պատրաստ է, եկե՛ք հարսանիքի»: Սակայն նրանք, բանի տեղ չդնելով, գնում են, մեկը՝ իր ագարակը, մեկը՝ իր առևտրին, ուրիշներն էլ բռնում են նրա ծառաներին, անպատվում ու սպանում: Թագավորը զորք է ուղարկում և բնաջնջում սպանողներին և այրում նրանց քաղաքը: Ծառաներին պատվիրում է. «Հարսանիքը պատրաստ է, բայց հրավիրվածները արժանի չէին: Արդ, գնացե՛ք հրապարակները և ում որ գտնեք, կանչեցե՛ք հարսանիքի»: Ծառաները ճանապարհներից հավաքում բոլոր նրանց, ում գտնում են՝ չարերին ու բարիներին, և հարսանիքը լցվում է հրավիրվածներով: Թագավորը հրամայում է դուրս հանել այն մարդուն, որը հարսանեկան զգեստ չուներ: Այս առակից խրատ առնելով՝ եկեք մենք անտարբեր չլինենք Աստծո հրավերքի նկատմամբ և անտարբեր չանցնենք եկեղեցու մոտով կամ տարբեր պատճառաբանություններով չհրաժարվենք եկեղեցի այցելելուց, ինչպես արեցին առակի հերոսները. մեկը կին էր առել, մյուսը՝ ագարակ, երրորդն էլ՝ եզներ:

Թող մեր հոգիները հարություն և վերազարթոնք ապրեն, որպեսզի կարողանանք լսել Տիրոջ կանչը և իմաստուն կույսերի պես պատրաստ լինենք մասնակցելու հարսանեկան խնջույքին:   

Շնորհք, սէր և խաղաղութիւն Տեառն մերոյ Յիսուսի Քրիստոսի եղիցի ընդ ձեզ, ընդ ամենեսեանսն. Ամեն:

 

Տեր Վահան քհն. Առաքելյան

05.05.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․