11 Օգոստոս, Գշ, Աստվածածնի պահքի Բ օր

Գրքեր

Աստծո թողտված գայթակղություններն ու վշտերը

Երբեմն մեզ պատահող փորձությունները հակաբիոտիկների նման են, որոնք Աստված տալիս է մեր հոգու հիվանդության ապաքինման համար: Այդ փորձությունները մեզ մեծ հոգևոր օգնություն են ցույց տալիս: Մարդը «թեթևակի հարված է ստանում ծոծրակին» Աստծո կողմից և նրա սիրտը փափկում է: Իհարկե, (առանց մեզ փորձելու էլ) Աստված գիտի, թե յուրաքանչյուրն ինչ վիճակում է գտնվում, բայց քանի որ մենք դա չգիտենք՝ Նա թույլ է տալիս մեզ անցնելու փորձությունների միջով, որպեսզի ճանաչենք ինքներս մեզ, բացահայտենք մեր մեջ թաքնված կրքերը և Ահեղ Դատաստանի օրը դժգոհություն չունենանք: Քանի որ, եթե նույնիսկ Աստված փակեր աչքերը մեր կրքերի վրա և մեզ Դրախտ ընդուներ այնպես, ինչպես կանք, ապա Դրախտում ևս խռովությունների և դժգոհությունների ալիք կբարձրացնեինք: Այդ պատճառով էլ Աստված բանսարկուին թույլ է տալիս այստեղ գայթակղություններ ստեղծել, որպեսզի դրանք մեր մեջ եղած (կրքերի) փոշին այնպես թափ տան, որ վշտերի միջոցով մեր հոգին մաքրվի և խոնարհ դառնա: Իսկ դրանից հետո Աստված առատորեն մեզ է բաշխում Իր բարեբերությունը:

Իրական ուրախությունն այն դառնությունից է ծնվում, որը մարդ ուրախությամբ է ընդունում հանուն Քրիստոսի, Ով դառնություն ճաշակեց, որպեսզի փրկի մեզ: Քրիստոնյան հատկապես պետք է ուրախանա այն ժամանակ, երբ փորձության մեջ է ընկնում՝ առանց դրա համար առիթ տալու:

Երբեմն Աստծուն ասում ենք. «Տեր Աստված, առանց իմանալու, թե ինչ Ես անելու՝ ինձ ամբողջովին Քեզ եմ հանձնում, որպեսզի ինձ մարդ դարձնես»: Եվ Աստված, այդ բառերը լսելով, կամենում է ինձ ոչ թե միայն մարդ դարձնել, այլ մարդուց առավել մի բան: Այդ պատճառով էլ թույլ է տալիս, որպեսզի սատանան գա, գայթակղի ու տանջի ինձ: Այժմ, երբ քաղցկեղով հիվանդ եմ, տեսնում եմ չարի խարդախություններն ու դրանք ինձ համար ծիծաղելի են դառնում: Ահա՛, թե ինչպիսին է այդ սատանան: Գիտե՞ք, թե սատանան ինչ օճառով է մարդուն լվանում, երբ Աստված նրան թույլ է տալիս գայթակղել, որպեսզի մարդը փորձությունների միջով անցնի: Սատանան մարդուն իր չարության փրփուրով է լվանում: Ահա՛, թե ինչ լավ օճառ ունի: Նման իրավիճակներում սատանան իրեն ուղտի պես է պահում, որը չարանալիս փրփուր է թքում: Իսկ հետո նա սկսում է տրորել մարդուն: Իհարկե դա մարդուն աղտից մաքրելու համար չի անում: Ո՛չ, չարությունից դրդված է անում: Սակայն Աստված բանսարկուին թույլ է տալիս տրորել մարդուն այնքան ժամանակ, մինչև նրա կեղտոտ բծերը չմաքրվեն և նա մաքուր չդառնա: Քանի որ, եթե Աստված սատանային թույլ տար մարդուն այնպես տրորել, ինչպես երբ հագուստն են լվանում, ապա սատանան մարդուն ցնցոտիների կվերածեր:

- Հա՛յր, կարո՞ղ ենք արդյոք ասել, որ մեր կյանքում պատահող զանազան փորձություններն Աստծո կամքով են կատարվում:

- Ո՛չ, Աստծո կամքը չխառնենք այն ամենի հետ, ինչ բանսարկուն է բերում: Աստված Իր թողտվությունն է տալիս սատանային՝ մարդուն գայթակղելու մինչև որոշակի պահը: Եվ մարդուն էլ ազատություն է տալիս՝ բարին կամ չարը գործելու: Սակայն Աստված մեղավոր չի լինի մարդու գործած չարի համար: Օրինակ՝ Հուդան Քրիստոսի աշակերտն էր: Սակայն մի՞թե թույլատրելի է ասել, որ Աստծո կամքն էր, որպեսզի նա դավաճան դառնար: Ո՛չ, Հուդան ինքը թույլ տվեց, որպեսզի սատանան իր մեջ մտնի: Մի մարդ հոգևորականին խնդրեց. «Հա՛յր, խնդրում եմ Հուդայի համար հոգեհանգստի կարգ կատարեք»: Դա միևնույնն է, թե ասեր. «Դու արդար չես, Քրիստո՛ս: Քո կամքն էր, որպեսզի Հուդան մատներ քեզ: Այդ պատճառով էլ օգնիր հիմա նրան»:

Հազվադեպ է պատահում, որ Աստված թույլ տա երկյուղածությամբ լի որոշ մարդկանց փորձությունների միջով անցնելու, որպեսզի սխալ կյանքով ապրող մեկը սթափվի և ապաշխարի: Որոշ մարդիկ իրենց կյանքի մեղքերն են քավում փորձությունների միջոցով, սակայն անարդարացիորեն տրտնջում են: Աստված նրանց հնարավորություն է տալիս օգնություն ստանալու՝ տեսնելով այն մարդկաց համբերության օրինակը, ովքեր մեղավոր չլինելով տառապում են և չեն տրտնջում: Այդպիսի ակնածալից մարդիկ կրկնակի վարձք են ստանում: Ենթադրենք, որ մի ընտանիքի շատ լավ, պատկառանքով լի հայր իր տանը նստած է կնոջ ու երեխաների հետ: Հանկարծակի երկրաշարժ է սկսվում, տունը քանդվում է, ընտանիքը մնում է փլատակների տակ և սարսափելի տանջանքներից հետո բոլորը մահանում են: Աստված ինչի՞ համար դա թույլ տվեց: Որպեսզի մյուսներն, ովքեր մեղավոր են և պատժի ենթակա, չտրտնջան:

Այդ պատճառով էլ նա, ով այն մեծ խաչերի մասին է խորհում, որ արդարներն են կրել, երբեք չի տրտմում իր սեփական փոքր փորձությունների պատճառով: Այդպիսի մարդիկ տեսնում են, որ չնայած իրենց կյանքում տարբեր մեղքեր են գործել՝ ավելի քիչ են տառապում, քան՝ արդարները և այդ պատճառով էլ խելամիտ ավազակի պես (Ղուկ. 23:39-43) խոստովանում են. «Այս մարդիկ ոչնչում մեղավոր չեն և այսպիսի տառապանքների միջով են անցել: Արդ, ինչպիսի՞ տառապանքների ենք մե՛նք արժանի»: Սակայն, դժբախտաբար, որոշ մարդիկ այն ավազակին են նման, որը Քրիստոսից ձախ խաչվեց: Այդպիսի մարդիկ տառապյալ արդարների մասին ասում են. «Մի տես է՜, ողջ կյանքում խաչը ձեռքից բաց չթողեցին և ինչպիսի՜ դժբախտություն պատահեց նրանց հետ»:

Ճիշտ է շատ հազվադեպ, բայց դեպքեր են լինում, երբ Աստված, սիրուց մղված, թույլ է տալիս, որպեսզի որոշ ընտրյալ անձնվեր ճգնավորներ մեծագույն փորձությունների միջով անցնեն: Նա այդ անում է նրանց պսակների արժանացնելու համար: Այդպիսի մարդիկ Քրիստոսին ընդօրինակողներն են: Տեսեք. Քանի որ Սուրբ Սինկլիտիկիան իր խրատներով շատ մարդկանց է օգնել հոգևոր առումով, սատանան ցանկացավ խանգարել նրան այդ գործում և հիվանդության պատճառով սուրբը երեք ու կես տարի համր մնաց*:

Իսկ ուրիշ դեպքերում Քրիստոսի իսկական հետևորդն Աստծուց ողորմածություն է խնդրում մերձավորների մեղքերը ներելու և Իր արդար ցասմանը չարժանացնելու համար: Այդպիսի մարդը խնդրում է, որպեսզի Աստված իրեն պատժի այդ մեղավոր մարդկանց փոխարեն, չնայած, որ ինքը մեղավոր չէ: Այդպիսի մարդն Աստծո հետ սերտ բարեկամական կապի մեջ է գտնվում և Աստծո սիրտը մեծ խանդաղատություն է ապրում Իր զավակի մեծագույն, վեհանձն սիրուց: Աստված այդպիսի մարդուն ոչ միայն իր խնդրած ողորմածությունն է անում, այսինքն ներում է ուրիշների մեղքերը, այլև թույլ է տալիս, որպեսզի իր ջերմեռանդորեն արված խնդրանքի համաձայն մարտիրոսական վախճան ունենա: Եվ միևնույն ժամանակ Աստված այդ մարդու համար դրախտի ամենալավ ապարանքն ու մեծ փառք է պատրաստում, որովհետև շատ մարդիկ անարդարացիորեն էին դատել այդ մարդու մասին և մտածել էին, որ Աստված պատժում է նրան սեփական մեղքերի համար:

                                         

* Սուրբ Սինկլիտիկիայի հիշատակությունը կատարվում է հունվարի 5-ին: Տես, Վարք Սրբոց ռուսերեն լեզվով: Հունվար: Մ. 1904, էջ 189:

 

Պաիսիոս Աթոսացու «Ընտանեկան կյանք» գրքից

Ռուսերենից թարգմանությունը՝ Էմիլիա Ապիցարյանի

13.07.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․