4 Հունիս, Եշ, Ե օր Հոգեգալստյան, Պահք

Գրքեր

Աստվածահաճո գործերով արժևորված ժամանակը

Ժամանակը մեր շուրջն անընդհատ փոխվում է, փոփոխվող աշխարհում ոչինչ հաստատուն չէ: Պլանները, որ մարդը կառուցում է ապագայի համար, հնարավոր է չիրագործվեն. առողջ մարդը կարող է վաղը հիվանդանալ, հարուստը աղքատանալ, կամ մարդը, որ այսօր ապրում է, վաղը կարող է այլևս չլինել: Փոփոխական և անցողիկ աշխարհում կարևոր է, թե մարդն ի՞նչ ժամանակով է ապրում, ո՞րն է իր համար գլխավոր ժամանակը: Իմաստուններից մեկն ասել է, որ մեծ խնդիրներն առաջ են գալիս ժամանակին չարված փոքր գործերից: Տերը պատգամում է մարդուն ապրել ներկայով, արժևորել ապրած յուրաքանչյուր օրը և արժևորել պատվիրանապահությամբ, երբեմն մարդու համար փոքր թվացող բարի գործերով. «Մի՛ հապաղիր կարոտյալին բարություն անել, երբ քո ձեռքը կարող է օգնել նրան: Չասես թե՝«Գնա՛, կգաս, վաղը կտամ», մինչդեռ կարող ես բարություն անել, քանի որ չգիտես, թե վաղն ինչ է բերելու քեզ» (Առակ. 3:27-29): Եկեղեցու հայրերն էլ իրենց հերթին հորդորում են օրն ապրել՝ որպես կյանքի վերջին օր, որպես ապաշխարության և բարիք գործելու ևս մեկ հնարավորություն:

Աստվածապարգև օրն աստվածահաճո գործերով արժևորելու նպատակ են հետապնդում այն սոցիալական ծրագրերը, որ իրագործվում են եկեղեցական համայնքային կյանքից ներս: Հունիսի 14-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանը Մանուկյան Ռուզաննային (52 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Ռուզաննայի տասներեքամյա դուստրը՝ Մելինեն (13 տ.), տառապում է մանկական ուղեղային կաթված (ՄՈՒԿ) հիվանդությամբ: Երեխայի ծնունդից հետո ընտանիքի հայրը լքել է ընտանիքը, և Ռուզաննան դստեր հետ տեղափոխվել է իր ծնողների բնակարան, որ գտնվում է Էջմիածին ք. Չարենցի փողոց 3-րդ շենք, 23 բն. հասցեում: Ընտանեկան նպաստի և երեխային հատկացվող հաշմանդամության գումարով նա մեծ դժվարությամբ է կարողանում հոգալ իրենց կարիքները: «Աղջիկս սովորում է Էջմիածնի Ե. Օտյանի անվան թիվ 7 ներառական դպրոցում: Նա ո՛չ խոսում է, ո՛չ քայլում, տարբեր վերականգնողական կենտրոններ հաճախելուց բացի ես նրան ձիարշավարան և շաբաթը երկու անգամ խեցեգործության եմ տանում: Փառք Աստծո, մի փոքր առաջընթաց ունենք»,- ասաց Ռուզաննան և շնորհակալություն հայտնեց Վարդանյան ընտանիքին՝ ցուցաբերված աջակցության համար:

 

Կարինե Սուգիկյան

14.06.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․