Գրքեր

Աստվածածնի վերափոխման տոնի քարոզ

«Ուրախ լեր, բերկրեալդ, Տէր ընդ քեզ»:

«Ուրախացի՛ր, ով շնորհընկալ, Տերը քեզ հետ է» (Ղուկաս 1:28):

Սիրելի՛ հավատավոր քույրեր և եղբայրներ.

Այսօր Հայ Առաքելական Սուրբ Եկեղեցին տոնում է իր հինգ տաղավար տոներից՝ Սուրբ Աստվածածնի վերափոխումը: Աստվածածնի վերափոխումը Աստվածամոր փոխադրումն է երկինք իր Միածին Որդու առաջնորդությամբ:

Սուրբ Կույսը Հիսուս Քրիստոսի համբարձումից հետո տասներկու տարի ապրեց Սուրբ Հովհաննես առաքյալի խնամածության ներքո: Գաբրիել հրեշտակապետը, որ ավետել էր նրան, որ պիտի հղիանա և ծնունդ տա Աստծո Միածին Որդուն, կրկին հայտնվում է և հայտնում նրան, որ հասել է նրա ննջման ժամանակը: Տիրամայրը իր մոտ է կանչում իր մտերիմներին, ազգակիցներին և հրաժեշտի ու մխիթարանքի խոսքեր ասում: Հիսուսի աշակերտներն անչափ տխրում են և սկսում լաց լինել, որ պետք է ընդմիշտ բաժանվեն Աստվածամորից, սակայն վերջինս նրանց խնդրում է չմթագնել իր ուրախությունը իրենց լացուկոծով:

Այդժամ Հովհաննես Ավետարանիչը, վերցնելով կիպարիսի մի փայտ, կերպաձևում է Աստվածամոր պատկերը: Այնուհետև այն տալիս է Սուրբ Կույսին, որպեսզի իր դեմքը դրոշմի դրա վրա, որպեսզի նրա մահից հետո այն իրենց մոտ մնա՝ իբրև մխիթարություն և սփոփանք: Սուրբ Մարիամ Աստվածածինն աղոթում է և նրա դեմքը դրոշմվում է դրա վրա: Քրիստոս Իր երկնային զորքով, հրեշտակների ուղեկցությամբ գալիս է Իր մոր հոգին առաջնորդելու դեպի երկինք:

Երբ Տիրամորը պիտի հուղարկավորեին, հրեաները որոշում են խորտակել նրա դագաղը: Սոփոնիա անունով մի քահանա ցանկանում է հարվածել դագաղին, անմիջապես ձեռքերը կտրվում են արմունկներից, և նա ընկնում է գետնին: Սարսափահար աղերսում է Քրիստոսի աշակերտներին, որ ողորման իրեն: Սուրբ Պետրոս առաքյալը բժշկում է նրան՝ ձեռքերը կպցնելով մարմնին: Աստվածամոր հուղարկավորությունից հետո Քրիստոս նրա մարմինը միավորում է հոգու հետ, ուստի մենք բոլորս գիտենք, որ Սուրբ Կույսը երկնքում է մարմնապես և Աստծո առաջ հանապազ բարեխոսում է մեզանից յուրաքանչյուրի համար:

Քանի որ Սուրբ Բարդուղիմեոս առաքյալը բացակա էր նրա հուղարկավորության ժամանակ և, ի տարբերություն մյուս աշակերտների, չէր կարողացել հրաժեշտ տալ իրենց սիրելի մորը, խնդրում է առաքյալներին, որպեսզի բացեն գերեզմանը, որպեսզի կարողանա գեթ մի փոքր սգալ և մխիթարվել: Երբ բացում են գերեզմանը, այն դատարկ են գտնում: Երկնքից հնչած ձայնն ասում է նրանց, որ Աստվածամայրը փոխադրվել է երկինք: Առաքյալները ցնծում են և աղոթում և Սուրբ Կույսի պատկերը տալիս են Բարդուղիմեոս առաքյալին, որը նա իր հետ բերում է Հայոց աշխարհ:

Սուրբ Կույսը բազմած է երկնքում և ցնծություն է մեզ համար, որովհետև մենք բարեխոս ունենք մեզ համար երկնքում, որի աղոթքները հանապազ հնչում են մարդկության համար, և որի աղոթքներին մենք, հիրավի, ապավինում ենք:

Սուրբ Մարիամ Աստվածածինը մեզ համար նաև անձայն քարոզիչ է, իր վարքով անդադար վկայում է մեր կյանքում պատվիրանապահության կարևորության մասին: Մենք նրանից մշտապես կարող ենք սովորել մաքրություն և մաքուր լինենք մեր սրտերով, մտքերով, խորհուրդներով, մեր գործերով: Մաքուր լինենք առաջին հերթին Աստվածապաշտության մեջ: Ինչպես Սողոմոն թագավորն էր խնդրում և աղոթում. «Մեր սրտերը հավատարիմ թող լինեն մեր Տեր Աստծու նկատմամբ, որպեսզի մենք մաքուր սրտով ընթանանք ըստ նրա հրամանների և պահենք նրա պատվիրանները» (Թագավորություններ Գ 8:61):

Մաքուր պահենք մեր հոգիները՝ մեղքից հեռու մնալով, մեր աչքերն ու ականջները մաքրենք մեղքերից, մեր բոլոր զգայարանները թող մաքուր և պատրաստ լինեն Սուրբ Հոգու բնակության համար: Մաքուր լինենք բոլոր հարաբերություններում՝ առանց կեղծիքի ու կեղծավորության, առանց խաբեության ու խարդավանքի, առանց նենգության, լինեն դրանք ամուսնաընտանեկան հարաբերություններ թե ընկերային, աշխատանքային թե գործընկերային, առևտրում թե տանը, վերադաս և ենթակա հարաբերություններում: Ազնվությունն ու անկեղծությունը ապահովում են մաքուր խիղճ: Եվ հակառակը, եթե մենք խղճով առաջնորդվենք, մաքուր կլինենք մեղքերից և դատապարտության չենք արժանանա:

Սիրելինե՛ր, ինչպես հայտնի է, այսօր հայ եկեղեցիներում կատարվում է խաղողօրհնեք:

Ադամի և Եվայի խաբվելով մարդկությունն անեծքի տակ ընկավ, անեծքի տակ ընկավ նաև ողջ բնությունը, որն օրհնվեց մեր Տեր և Փրկիչ Հիսուս Քրիստոսով, Որը մարդացավ, մարմնացավ Սուրբ Մարիամ Աստվածածնից: Աստվածամայրն իր խոնարհությամբ ոտնակոխ արեց այն օձին, որից խաբվեց նախամայր Եվան: Ուստի պատահական չէ, որ այսօր՝ Աստվածածնի Վերափոխման տոնին, եկեղեցու կողմից օրհնվում են երկրի ամբողջ բերքն ու բարիքը՝ ի մասնավորի խաղողը: Ինչո՞ւ խաղողը, որովհետև Քրիստոս ասաց. «Ես եմ որթատունկը, իսկ դուք՝ ճյուղերը» (Հովհաննես 15:5): Այդ որթատունկի վրա հաստատված լինելով է, որ մենք՝ այդ Որթատունկի ճյուղերը, կարող ենք իսկապես պտղաբերել: Խաղողն է, որ գինի դառնալով, սրբագործվում է պատարագի ժամանակ և դառնում Քրիստոսի կենարար արյուն, որով փրկություն է բաշխվում ամբողջ աշխարհին: Ամեն տարի խաղողը ճմլվում է և գինի դառնում, որ կյանքի խորհուրդն ունի իր մեջ, ինչպես Քրիստոս մարմին առավ Սուրբ Կույս Մարիամից և շարունակաբար փրկություն ու կյանք է տալիս աշխարհին: Հիշենք նաև, որ Կանայի հարսանիքում գինու պակասության ժամանակ Տերը ջուրը գինի դարձրեց հենց Աստվածածնի խնդրանքով:

Մաղթում եմ, որ Տիրամոր բարեխոսությամբ նախ և առաջ մեր հոգիներն ու մարմինները մաքրվեն մեղքերից, և մեր թակույկները, ըստ Աստծո կամքի հաճության, լցվեն կենսատու գինով: Թող Աստծո կողմից օրհնվեն բոլոր պտուղները, ի բարին ծառայեն, որ մարդիկ սովորեն իրենց բերք ու բարիքից մասնաբաժին հանել նաև ուրիշներին, քանի որ Աստված էլ, օրհնելով երկիրը, ձրիաբար բաշխում է բոլորին, որպեսզի մարդիկ միմյանց կարիքները լրացնեն, այլ ոչ թե իրենց ունեցածը ծառայեցնեն միմիայն սեփական անձերին: Թող Աստվածամոր բարեխոսությամբ մեր հասույթներն ու ձեռքբերումները երբեք դատապարտություն չդառնան մեզ համար, այլ ինչ որ մեզ տրվել է Երկնային Թագավորի կողմից, ծառայի Աստծո փառաբանությանն ու ընդհանուրի բարօրությանը: Եվ թող այս տաղավար տոնը իսկապես ուրախության և ցնծության օր դառնա մեր ընտանեկան խաղաղ հարկերից ներս:

Շնորհք, սէր և խաղաղութիւն Տեառն մերոյ Յիսուսի Քրիստոսի եղիցի ընդ ձեզ, ընդ ամենեսեանսն. Ամեն:

 

Տեր Վահան քհն. Առաքելյան

18.08.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․