«Այն, ինչ կորցնես հանուն Աստծո, կպահպանես, իսկ ինչ պահպանես հանուն քեզ, կկորցնես»

Երբ մարդու սիրտը լի է աստվածային սիրով, ապա նա սկսում է լիարժեքորեն ճանաչել և վայելել Արարչի սերը և նրա համար այլևս դժվար չէ սիրել Նրան ու բոլոր նրանց, ովքեր պատկանում են Տիրոջը: Եկեղեցու հայրերն իրենց մերձավորի հանդեպ այն աստիճանի սեր ունեին, որ շատերին այն թվում էր անհավանական, բայց անհավանական ոչինչ չկա նրա համար, ով փոխել է իր միտքը և սկսել է մտածել ու ապրել Աստծո խոսքի համաձայն:

Դեռևս առաջին դարից եկեղեցում Տիրոջով համախմբված համայնքներն աստվածային սիրո միավորիչ ուժով ամոքում ու դարմանում էին իրենց մերձավորների ցավերը: Այսօր էլ Տերն իր բուժիչ բալասանն է բաշխում Իր որդիներին եկեղեցու միջոցով:

Հունվարի 22-ին Զորավոր Ս. Աստվածածին եկեղեցում, հոգևոր հովիվ Տեր Գիրգոր քահանա Գրիգորյանը Ոսկանյան Սիրանուշին (29 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանը: Կարիքավոր բազմազավակ ընտանիքը բնակվում է Էջմիածին քաղաքի Զվարթնոց թաղամասի, Մաշտոց փողոցի 13 հասցեում: Յոթ անչափահաս զավակների մայրը նշեց, որ ամուսինը՝ Ոսկանյան Ալեքսանը (49 տ.), 2-րդ խմբի հաշմանդամ է և ի վիճակի չէ աշխատելու: Բազմանդամ ընտանիքն ապրում է տարրական հարմարություններից և պայմաններից զուրկ երկու սենյականոց խոնավ բնակարանում: Սիրանուշն ասաց, որ ապրում են ամուսնու հասանելիք թոշակով և ընտանեկան նպաստով, որը չի բավականացնում ամենօրյա ծախսերի համար, այդ պատճառով ստիպված են լինում խանութներից պարտքով գնումներ անել: Ֆինանսական խնդիրների պատճառով երեխաներից չորսը հաճախում են գիշերօթիկ դպրոց: Կարիքավոր ընտանիքն օգտվում է Մայր Աթոռ Ս. Էջմիածնի «Հրաչ և Սյուզան Թուֆայան» հայորդյաց տանը կից գործող բարեգործական ճաշարանից: Ոսկանյան Սիրանուշն իր երախտագիտությունը հայտնեց Զորավոր Ս. Աստվածածին եկեղեցու համայնքին, Տեր Գրիգորին և աջակից անձին, որ կարեկից եղան իրենց խնդիրներին:

Ըստ Ս. Նիկոլայ Սերբսկու՝ այն, ինչ կորցնես հանուն Աստծո, կպահպանես, իսկ ինչ պահպանես հանուն քեզ, կկորցնես: Այն, ինչ տվել ես հանուն Աստծո անվան, կհատուցվի քեզ հարյուրապատիկով, իսկ ինչ տվել ես հանուն փառասիրության, կկորչի: Ամեն ինչ, որ ընդունես մարդկանցից հանուն Աստծո, կբերի քեզ ուրախություն, իսկ եթե ընդունես որպես վարձատրություն, կհայտնվես հոգսերի մեջ:

Կարինե Սուգիկյան