Գրքեր

Բարեգործության հիմքը սերն է

Ս. Զատկին հաջորդող Հինանց շրջանում ևս Զորավոր Ս. Աստվածածին եկեղեցու համայնքը, ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, նախանձախնդրորեն շարունակում է սոցիալական ծրագրերի իր շարքը: Ապրիլի 19-ին համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, այցելեց Սիմոնյան կարիքավոր ընտանիքին՝ փոխանցելով նրանց Ս. Հարության ավետիսը: Սիմոնյան Նաիրան (33 տ.) իր 11-ամյա դստեր՝ Նարե Սիմոնյանի հետ բնակվում է Պուշկինի 49 հասցեում տեղակայված քարե ավտոտնակում, որ զուրկ է տարրական պայմաններից: Ընտանիքի հայրը մահացել է տասը տարի առաջ ավտովթարից, դժբախտ պատահարի հետևանքով Նաիրան էլ գլխի վնասվածք է ստացել, ինչի հետևանքով առ այսօր առողջական խնդիրներ ունի: Ավտովթարից երկու տարի անց Նաիրան իր դստեր հետ ստիպված է եղել վարձակալությամբ ապրել: «Մեկ տարի է, ինչ աղջկաս հետ բնակվում ենք այս տնակում, որ մի բարի մարդ է տրամադրել մեզ, քանի որ հայտնվել էինք փողոցում՝ տան վարձը չվճարելու պատճառով»,- ասաց Նաիրան: Մանկավարժական կրթություն ստացած ընտանիքի մայրը ժամանակ առ ժամանակ որպես մաքրուհի է աշխատում, որպեսզի իր վաստակածի և ընտանեկան նպաստի գումարներով կարողանա հոգալ իր ընտանիքի նվազագույն կարիքները: Նաիրան նշեց, որ Նարեն ամեն օր դպրոցի դասերն ավարտելուց հետո հաճախում է «Օրրան» բարեգործական հասարակական կազմակերպություն:

Տեր Գրիգորը բժշկության աղոթք կարդաց ընտանիքի համար և նրանց հանձնեց դրամական օգնություն (50 000 դրամ), որ տրամադրել էր Նարինե Հակոբյանը իր հոգելույս ամուսնու՝ Հրաչ Վարդանյանի հիշատակի համար: Սիմոնյան Նաիրան իր շնորհակալությունը հայտնեց Տեր Գրիգորին, համայնքին և աջակից անձին՝ իր ընտանիքին աջակցելու համար:

Բարեգործության հիմքը սերն է Աստծո և Նրա պատգամների հանդեպ. «Եթե սիրում եք Ինձ, պիտի գործադրեք Իմ պատվիրանները» (Հովհաննես 14:15): Ս. Մակար Մեծը նշում է, որ բոլոր առաքինությունները շղթայաձև փոխկապակցված են միմյանց. աղոթքը՝ սիրո, սերը՝ ուրախության, ուրախությունը՝ խոնարհության, խոնարհությունը՝ հնազանդության: Կատարելության ձգտողը՝ Տիրոջ խոսքի համաձայն, թե՝ «Կատարյա՛լ եղեք դուք, ինչպես ձեր երկնավոր Հայրն է կատարյալ» (Մատթեոս 5:48), անխոնջ ընթանում է առաջ՝ անտեսելով իր ճանապարհին հանդիպող ամեն մի դժվարություն: Կատարելության ուղին սկիզբ է առնում ժամանակավոր այս աշխարհում՝ իր ավարտը գտնելով հավիտենական կյանքում:

 

Կարինե Սուգիկյան

19.04.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․