Բարին գործող մարդը Աստծո գործակիցն է

Քրիստոս մարդացավ, որպեսզի մարդիկ Նրան հետևելով, նոր մարդ դառնան՝ հին մարդուց հրաժարվելով: «Մի՛ ընդօրինակեք այս աշխարհի մարդկանց վարմունքը, այլ նոր մարդ եղեք նորոգված մտքերով, որպեսզի իմանալով Աստծո կամքը, ձեր փորձառությամբ ընտրեք լավը, այսինքն՝ ինչ որ բարի է, ինչ որ ընդունելի է Նրան և կատարյալ»,- ասել է Ս. Պողոս առաքյալը (Հռոմ. 12:2): Քրիստոնյայի համար Քրիստոս լավագույն օրինակ է, Ում պետք է բոլորն ընդօրինակեն: Զուր չէ, որ եկեղեցին հարգում է սրբերին և հարգում է ոչ այն պատճառով, որ նրանք առանձնահատուկ էակներ են, այլ որ Քրիստոսին նմանվելու ճանապարհին նրանք մեծ ջանք ու եռանդ թափեցին: Որքան մարդ մոտ է Քրիստոսին, այնքան առավել է կրում Նրան իր սրտում և այնքան առավել է Նրա լույսն ու սերը ճառագում իր միջավայրում:

Հոկտեմբերի 4-ին Զորավոր Ս. Աստվածածին եկեղեցում հոգևոր հովիվ Տեր Գրիգոր քահանա Գրիգորյանը, սոցիալական ծրագրերի շրջանակում, Կարապետյան Էլմիրային (36 տ.) հանձնեց դրամական օգնություն (50 000 դրամ), որ տրամադրել էր համայնքի անդամ Արփի Դալլաքյանը: Էլմիրան իր յոթ զավակների հետ բնակվում է Արմավիրի մարզի Ակնաշեն գյուղի Թումանյան 3 հասցեում: Ընտանիքի հայրը մեկ ու կես տարի առաջ մահացել է, և բազմազավակ ընտանիքը մի շարք խնդիրների առջև է կանգնել: Միայն կերակրողին կորցնելու դեպքում կենսաթոշակով բավարարվող և ընտանեկան նպաստ ստացող ընտանիքը դժվարությամբ է կարողանում հոգալ իր ամենօրյա կարիքները: Էլմիրան իր երախտագիտությունը հայտնեց աջակից անձին՝ օգնության ձեռք մեկնելու համար:

Հոգևոր ուղին, որով անցնում է քրիստոնյան, ճանաչելի է դառնում Սուրբ Հոգու պտուղներով, որոնք են՝ սեր, ուրախություն, խաղաղություն, համբերատարություն, ազնվություն, բարություն, հավատարմություն, հեզություն, ժուժկալություն (Գաղ. 5:22): Սուրբ Հոգու պտուղները տեսանելի են առօրյա կյանքում մարդկային փոխհարաբերությունների մեջ: Ամենայն բարիք, որ ունի մարդ, Աստծո պարգևն է, և քանի որ Աստված է բարության աղբյուրը, ապա բարին գործող մարդը Աստծո գործակիցն է:

Կարինե Սուգիկյան