Գրքեր

Բյուրականում «Զորավոր մանկունք»-ն իր ելույթով ազդարարեց հոգևոր երաժշտության շաբաթի սկիզբը

«Երևանյան հեռանկարներ» միջազգային երաժշտական 16-րդ փառատոնի շրջանակներում Հայոց ցեղասպանության 101-րդ տարելիցի առիթով Հայաստանում է «Գրեմմի» և մի շարք այլ միջազգային հեղինակավոր մրցանակների արժանացած Էստոնիայի ազգային արական երգչախումբը:

1944 թ-ից գործող համաշխարհային համբավ ունեցող երգչախումբը ապրիլի 23-ից համերգային ելույթներով հանդես եկավ Վանաձորում, Ծիծեռնակաբերդի հուշահամալիրում, Արամ Խաչատրյան համերգասրահում, իսկ ապրիլի 26-ին՝ Բյուրականի Սբ. Հովհաննես եկեղեցու բակում՝ կատարելով էստոնական երգեր, նաև՝ Կոմիտաս ու Եկմալյան: Երգչախումբն իր համերգային ծրագրերում մշտապես ընդգրկում է հայ կոմպոզիտորների գլուխգործոցները և հայ հոգևոր երաժշտությունը:

Մինչ երգչախմբի ելույթը, Սբ. Հովհաննես եկեղեցում ներկաներն ունկնդրեցին Զորավոր Սբ. Աստվածածին եկեղեցու «Զորավոր մանկունք» երգչախմբին: Վաղ միջնադարում կառուցված եկեղեցու պատերից ներս մանուկներն իրենց քաղցրահնչուն ձայնով հնչեցրին կոմիտասյան «Տեր ողորմեա»-ն, Գիշերային ժամերգության «Զարթիք փառք իմ», Մաշտոցի «Բազում են Քո գթութիւնք», Խորենացու «Մեծացուսցէ»-ն և «Այսօր տոն է»:

««Երևանյան հեռանկարներ» միջազգային երաժշտական փառատոնի շրջանակներում այս տարվանից սկսյալ Բյուրականում ավանդական կդառնա ապրիլ 24-յան շաբաթը անցկացնելու՝ որպես հոգևոր երաժշտության շաբաթ: Եվ «Զորավոր մանկունք»-ը՝որպես լավագույն երգչախումբ, խորհրդանշեց այս նախաձեռնության սկիզբը և ներկաներին հիացրեց իր կատարումով»,- ասաց «Երևանյան հեռանկարներ» միջազգային երաժշտական փառատոնի գլխավոր մենեջեր Սոնա Հովհաննիսյանը:

Իսկ «Երևանյան հեռանկարներ» միջազգային երաժշտական փառատոնի և «Բյուրական» արվեստի ակադեմիայի հիմնադիր նախագահ, կոմպոզիտոր Ստեփան Ռոստոմյանը նշեց, որ եթե հայ աստղագետ և աստղաֆիզիկոս Վիկտոր Համբարձումյանի շնորհիվ Բյուրականը աշխարհին հայտնի դարձավ՝ որպես հայ աստղագիտության կենտրոն, ապա այսօր էլ իրենք կփորձեն մշակութային լեզվով Բյուրականը աշխարհին ճանաչելի դարձնել՝ որպես արվեստի քաղաք:

«Զորավոր մանկունք»-ի գեղարվեստական ղեկավար Գոհար Հարությունյանը շնորհակալություն հայտնեց «Երևանյան հեռանկարներ» միջազգային երաժշտական փառատոնի գլխավոր մենեջեր Սոնա Հովհաննիսյանին հրավերի համար և նշեց, որ իրենց համար մեծ պատիվ էր նման փառատոնին մասնակցելը և Էստոնիայի ազգային արական հանրահայտ երգչախմբի ելույթն ունկնդրելը: Ապա հավելեց. «Երեխաների համար նաև ուսուցողական էր օրը, քանի որ երգչախումբը կատարումներն ընդմիջում էր՝ ներկայացնելով երաժշտության հետ կապված բացատրություններ: Համերգից հետո երեխաների մոտ նկատելի էր կատարողական որակի բարձրացում, քանի որ դրան է նպաստում ամեն մի բարձրակարգ երաժշտության ունկնդրում»:

 

Կարինե Սուգիկյան

26.04.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․