Գրքեր

Ճշմարիտ պահեցողության ընթացքը

Փետրվարի 24-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը սիրահայ համայնքից Լենա Քեշիշյանին ( 50 տ.) հանձնեց դրամական օգնություն (6 000 ռուբլի), որ տրամադրել էր Ռուսաստանի Դաշնությունում բնակվող մեր հայրենակիցը, ով չցանկացավ իր անունը նշել: Սիրիայում ծագած պատերազմի պատճառով Լենան իր մայրիկի՝ Անժել Նազարյանի (84 տ.) և 1-ին խմբի հաշմանդամ եղբոր՝ Հովհաննես Քեշիշյանի (57տ.) հետ երկու տարուց ավել է, ինչ եկել է Հայաստան՝ վարձակալությամբ բնակվելով Եղբայրության փ. 60/19 հասցեում:

«Մեծ խնդիրների առջև ենք կանգնած. մայրս և եղբայրս անկողնային հիվանդ են և մշտական խնամքի կարիք ունեն, ես էլ, առողջական խնդիր ունենալով, մեծ դժվարությամբ եմ նրանց խնամում և ի վիճակի չեմ աշխատելու: Մորս և եղբորս հատկացվող թոշակների գումարով չենք կարողանում հոգալ մեր նվազագույն կարիքները: Շնորհակալ եմ «Առաքելություն Հայաստան» ԲՀԿ-ին, որ վճարում է մեր տան վարձի 60%-ը և տրամադրում մեզ համար անհրաժեշտ դեղորայքը: Շնորհակալ եմ Զորավոր Ս. Աստվածածին եկեղեցու հոգևոր հովվին և աջակից անձին, որ կրկին անգամ օգնության ձեռք մեկնեցին ընտանիքիս»,- ասաց Լենան:

Ճշմարիտ պահեցողության մեջ գտնվողի համար մշտական ուղեկիցներ են աղոթքը, զղջումը, ողորմածությունը, առանձնությունը, լռությունը, զսպվածությունը, ներողամտությունը, չար մտածումից հրաժարվելը: Եկեղեցու հայրերից Ս. Ներսես Շնորհալին հորդորում է հեռու մնալ որկրամոլությունից և պահեցողության ճիշտ ընթացք որդեգրել. «Ուստի աղաչում եմ՝ եթե անգամ շատ ուտելիք և ըմպելիք ունենաք ձեր ձեռքում և տանը, ձեր հոգիները խնայելով՝ ագահությամբ ու որկրամոլությամբ մի՛ վարվեք դրանց հետ, այլ… պարկեշտությամբ և օրինավոր կերպով: Եվ ինչ ձեզանից նվազեցնում եք ըստ Աստծո պատվիրանի՝ ի սեր կարոտյալ և չքավոր եղբայների, ծերերի և տկարների, նրա՛նց տվեք և ձեր հոգիների համար կրկնակի բարիք կամբարեք»:

 

Կարինե Սուգիկյան

24.02.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․