Գրքեր

Ճշմարտության մասին

Կար-չկար մի տաղանդավոր նկարիչ, որի մոտ մի անգամ արքայական նախարարը եկավ և հայտնեց, որ արքան պահանջում է իր դիմանկարը պատկերել: Տիրակալը խիստ բնավորություն ուներ և չնչին դժգոհության դեպքում անգամ կարող էր բանտարկել մարդուն կամ խլել նրա ունեցվածքը: Նա տգեղ տղամարդ էր. ծաղիկն այլանդակել էր նրա դեմքի կեսը և շատ դժվար էր այնպես նկարել, որ նրան դուր գար: Երբ նկարիչը պալատ գնաց, արքան ասաց.

- Դիմանկարս կպատկերես: Եթե ես այն հավանեմ՝ ոսկով կպատեմ քեզ, իսկ եթե ոչ՝ մեղքը քո վիզը:

- Շատ լավ,- համաձայնեց նկարիչը:

- Բայց մի բան պիտի հաշվի առնես,- ավելացրեց տիրակալը,- ես պետք է նման լինեմ ինձ և կեղծիքն ու քծնողներին չեմ սիրում, բայց թույլ էլ չեմ տա, որ ինձ այլանդակ ներկայացնեն: Քեզնից առաջ շատերն են փորձել նկարել ինձ, սակայն մեկն ինձ չափազանց գեղեցիկ է պատկերել, մյուսը՝ չափազանց տգեղ, այնպես որ կամենում եմ, որպեսզի դու ինձ և՛ ճշմարտացի պատկերես, և՛ հմայիչ:

Նկարիչն անցավ գործի և ավարտելուց հետո թագավորը բացականչեց.

- Հանճարեղ է, դու ամենալավ նկարիչն ես, ում ես ճանաչում եմ:

Նկարիչը նրա անվնաս կիսադեմն էր պատկերել և այլանդակված կեսը չէր երևում, ուստի այն և՛ ճշմարտացի էր, և՛ գեղեցիկ:

 

Ինչպես ասել է փիլիսոփան՝ ճշմարտությունը կրակի պես է, մոտենաս՝ կայրի, հեռանաս՝ կսառչես: Պետք է կարողանալ այնպես ներկայացնել այն, որ չայրի, բայց միևնույն ժամանակ ճշմարտացի մնա:

 

Ռուսերենից թարգմանությունը՝ Էմիլիա Ապիցարյանի

27.12.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․