Դեպի կրակը թռչող թիթեռները

Թիթեռը դեպի կրակը թռավ:

- Ո՜ւր ես թռչում,- փորձեց նրան ետ կանգնեցնել ճանապարհին նստած վառված թևով թիթեռնիկը,- ահա՛ ես էլ թռա ու ի՞նչ ստացվեց դրանից:

- Նշանակում է ճիշտ կողմից չես մոտեցել,- ուրախ-ուրախ ձայնեց թիթեռը, զգուշորեն մոտեցավ խարույկին և նույնպես թևն այրեց՝ հրաշքով չմոխրանալով ամբողջովին:

Եվ երկուսով նստած դարդ են անում: Հանկարծ տեսնում են, որ մեկ այլ թիթեռ էլ է դեպի կրակը թռչում:

- Կա՛նգ առ,- գոռում են,- սպասի°ր:

Բայց ավաղ, նա նույնիսկ չլսեց նրանց: Այնպես էր սլանում, որ ոչ միայն թևն այրեց, այլ ամբողջովին կրակի բաժին դարձավ:

Թիթեռները, միմյանց նայելով, հոգոց հանեցին: Եվ հենց որ ուշքի եկան ու բուժեցին թևերը… կրկին դեպի խարույկը սլացան:

Ռուսերենից թարգմանությունը՝ Էմիլիա Ապիցարյանի