Դու քեզ բարեկեցությո՞ւն ես կամենում, բարեկեցություն կամեցիր և քո մերձավորին

Աստծո հանդեպ սիրո հիմքում մերձավորի հանդեպ սերն է: Աստծո պատկերը կրողի հանդեպ սեր և հարգանք ցուցաբերողի սրտում գործում է աստվածային սերը, որն անսահման է, քանի որ այդ սերը Ինքն անսահմանելի Աստվածն է (Ա Հովհաննես 4:16): Մերձավորի հանդեպ սիրո չափը հստակ որոշեց Տերը, երբ ասաց. «Այն ամենը, ինչ կամենաք, որ մարդիկ ձեզ անեն, այդպես և դուք արեք նրանց, որովհետև այդ իսկ են Օրենքն ու մարգարեները» (Մատթեոս 7:12): Եկեղեցու հայրերից Հայր Սավվան այս պատվիրանի հետ կապված ասել է. «Դու քեզ բարեկեցությո՞ւն ես կամենում, բարեկեցություն կամեցիր քո մերձավորին: Քեզ հաճելի՞ է, երբ քեզ քո կարիքի ժամանակ օգնում են, որքան կարող ես, աշխատիր և դու, օգնիր մերձավորիդ բոլոր կարիքների մեջ: Հատկապես օգնիր քո մտերիմներին և հարազատներին, ինչպես նաև` հաշմանդամներին»:

Զորավոր Սբ. Աստվածածին եկեղեցու համայնքը շարունակում է սոցիալական իր ծրագրերը՝ հիմք ունենալով «Ոսկե օրենքը» անունով հայտնի տիրավանդ այս պատվիրանը: Օգոստոսի 10-ին Զորավոր Սբ. Աստվածածին եկեղեցու համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, հերթական այցելությամբ եղավ Մալաթիա-Սեբաստիա թաղամասի Միքայելյան 33 հասցեում բնակվող Զաքարյան ընտանիքում: Երկու սենյականոց բնակարանում է ապրում հինգ հոգուց բաղկացած ընտանիքը, որ հայտնվել է սոցիալապես վատ վիճակում, քանի որ ընտանիքի հայրն ու մայրն առողջական խնդիրների պատճառով ի վիճակի չեն աշխատելու և ունեն խնամքի կարիք: Ընտանիքի հայրը՝ Զաքարյան Զավենը (60 տ.), վերջին տասնհինգ տարիների ընթացքում մի քանի ինֆարկտ է տարել, իսկ մայրը 45-ամյա Մանուշակ Իսպիրյանը գանգուղեղային վնասվածք է ստացել ավտովթարից, ինչի պատճառով նրա մոտ այդ խնդիրը տարեցտարի ավելի է բարդացել: Երկու անչափահաս երեխաների՝ Հասմիկի (15 տ.) և Արգինայի (11 տ.), ինչպես նաև նրանց ծնողների խնամքով զբաղվում է երեխաների մորաքույրը՝ Շուշան Իսպիրյանը, ով ևս չի աշխատում ընտանիքին խնամելու պատճառով: Նա նշեց, որ միայն մի քանի ամիս է, ինչ ընտանիքին հատկացվում է ընտանեկան նպաստ, որը չի բավարարում ընտանիքի ամենօրյա կարիքները հոգալուն և իր քրոջ ու փեսայի բուժմանն անհրաժեշտ դեղորայքը գնելուն: Շուշանը, նկատելով երեխաների մոտ երաժշտական ընդունակությունները, հնարավորինս նպաստել է, որ նրանք գեղագիտական դաստիարակություն ստանան: Հասմիկն ու Արգինեն մի քանի երաժշտական գործիքների (կիթառ, ջութակ, դաշնամուր, քամանչա) են տիրապետում:

Տեր Գրիգորը բժշկության աղոթք կարդաց ընտանիքի համար և նրանց հանձնեց Աշուղաթոյան ընտանիքի կողմից տրամադրած դրամական օգնություն, սննդի փաթեթներ ու հիգիենիկ պարագաներ:

Կարինե Սուգիկյան