Գրքեր

Եկեղեցուց բացակայելու կամ հրեշտակի նշանի մասին

Այս ծանր ժամանակներում, երբ հավատացյալ ժողովուրդը բացակայում է եկեղեցուց, նրանք, ովքեր ի սրտե ցանկանում են մասնակցել սուրբ արարողություններին, բայց ներկա իրավիճակից ելնելով՝ ստիպված են տանը մնալ, պետք է իմանան, որ Տիրոջ համար իրենք որպես մասնակիցներ են համարվում: Սրա մասին մեզ տեղեկացնում է Աբբա Դորոթեոս Գազացին՝ իր «Հոգեշահ ուսուցումներ» գրքում:

«Պատմեմ ձեզ սրա վերաբերյալ մի սքանչելիք, որ լսել եմ մի մեծ և պայծառատես ծերից: Եկեղեցում կանգնած՝ նա ականատես եղավ այն բանին, որ երբ եղբայրները սկսեցին սաղմոսերգությունը, մի լուսակիր այր դուրս եկավ ավագ խորանից՝ մյուռոնով լի անոթը և վրձինը ձեռքին պահած: Նա վրձինը թաթախում էր անոթի մեջ և շրջում բոլոր եղբայրների միջով՝ նշան դնելով նրանցից յուրաքանչյուրի վրա և որոշ բացակաների տեղերում, իսկ այլ բացակայողների տեղերը շրջանցում էր: Ժամերգության ավարտից առաջ ծերը կրկին տեսավ, թե ինչպես նա դուրս եկավ ավագ խորանից և կատարեց նույն բանը: Ծերը կանգնեցրեց նրան և, ընկնելով նրա ոտքերը, աղաչեց, որ բացատրի իրեն՝ ո՞վ է նա և ի՞նչ է անում: Այդ լուսակիր այրը պատասխանեց նրան. «Ես Աստծո հրեշտակն եմ, և ինձ հրամայված է կնքել այս նշանով նրանց, ովքեր եկեղեցի են գալիս սաղմոսերգության սկզբում և մնում են մինչև վերջ՝ շնորհիվ իրենց ջերմեռանդության, ջանասիրության և բարի հոժարակամության»: Ծերը հարցրեց նրան. «Ինչո՞ւ ես դու նշան դնում որոշ բացակայող եղբայրների տեղերում»: Ի պատասխան՝ սուրբ հրեշտակն ասաց նրան. «Եղբայրներից նրանք, ովքեր ջերմեռանդ են և ունեն բարի հոժարակամություն, սակայն, հայրերի օրհնությամբ դուրս են եկել եկեղեցուց ծայրահեղ տկարության պատճառով, կամ ինչ-որ հանձնարարություն ստանալով՝ զբաղված են այն կատարելով և այդ պատճառով այստեղ չեն գտնվում, ստանում են իրենց նշանը, որովհետև իրենց հոժարակամությամբ ներկա են լինում երգողների հետ: Միայն նրանց, ովքեր կարող են լինել եկեղեցում և չեն գալիս իրենց ծուլության պատճառով, ինձ կարգադրված է չտալ նշան, քանի որ այդպիսիներն իրենք իրենց անարժան են դարձնում դրան»:

Ջանացե՛ք, ուրեմն, եղբայրնե՛ր, երբեք չզրկվել սուրբ հրեշտակի նշանից»:

 

Աբբա Դորոթեոս Գազացի

16.05.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․