Գրքեր

Եկեղեցում սպասավորող փոքրիկ դպիրներն արժանացան ամանորյա նվերների

Դեկտեմբերի 25-ին Զորավոր Ս. Աստվածածին եկեղեցում մատուցվեց տարեվերջյան Ս. Պատարագը: Արարողության ավարտին եկեղեցու հոգևոր հովիվ Տեր Գրիգոր քահանա Գրիգորյանը եկեղեցում սպասավորող փոքրիկ դպիրների հետ զարդարում էին եկեղեցու բակը Ս. Ծննդյան խորհրդանիշներով: Նկատելի էր, թե ինչ ջանասիրությամբ էին տղաները օգնում Տեր Հորը Ս. Ծննդյան մսուրը պատրաստելիս, Կենաց ծառի խորհրդանիշ տոնածառը զարդարելիս:

Տեր Գրիգորի խոսքով այդ նույն ջանասիրությամբ և նախանձախնդրությամբ էլ փոքրիկ դպիրներն իրենց ծառայությունն են բերում Տիրոջը և եկեղեցուն. «Յուրաքանչյուր ոք, ով ամեն կիրակի վաղ առավոտյան մասնակից է լինում Առավոտյան ժամերգությանը և Ս. Պատարագին, ապա նկատած կլինի մեր կողքին կանգնած փոքրիկ դպիրներին, ովքեր սիրով և նախանձախնդիր ոգով մասնակցում են աստվածպաշտությանը: Եթե իրենց հասակակիցները կիրակի առավոտյան հանգստանում են, երկար քնում, մինչև ճաշի ժամը խաղով անցկացնում, ապա նրանք վաղ առավոտյան շտապում են դեպի եկեղեցի: Շնորհակալ եմ նրանց ծնողներից, որ իրագործում են այն կարևոր պարտականությունը, որին կոչված են իրենք՝ որպես ծնող. թույլ են տալիս իրենց երեխաներին և չեն արգելելում (Մատթեոս 19:14), որ գան դեպի Աստված, դեպի եկեղեցի: Դեռևս մանկուց նրանք քայլում են դեպի Աստված տանող ճանապարհով, սաղմոսերգուի խոսքի համաձայն, նրանք դաստիարակվում են՝ ըստ իրենց ընտրած ճանապարհի և ծերության ժամանակ էլ չեն հեռվանա դրանից (Առակներ 22:6): Իրենց հայացքից ճառագում է Աստծո և Մայր եկեղեցու հանդեպ անվերապահ սերն ու նվիրվածությունը: Նրանք՝ որպես Հայ եկեղեցու նվիրյալ զավակներ, օր-օրի աճում են Տիրոջ շնորհով և գիտությամբ: Ուստի Ամանորի և Ս. Ծննդյան տոներին ընդառաջ որոշեցինք խրախուսել իրենց՝ անձնվեր ծառայասիրության համար»:

Դպիրներից Խաչատրյան Մարտիկը (12 տ.) մեկ տարի է, ինչ մեծ ուրախությամբ ծառայում է Զորավոր Ս. Աստվածածին եկեղեցում: «Ամեն անգամ Ս. Խորան բարձրանալով՝ ես նոր կյանք եմ ստանում»,- ասաց նա:

10-ամյա Ստեփանի համար ընդհանրապես դժվար չէ կիրակի վաղ առավոտյան արթնանալը: Ինչպես նա նշեց շաբաթվա մեջ ընդամենը մեկ օրը՝ կիրակին է սուրբ, որն ինքը Աստծուն է նվիրում: «Ինձ համար էլ դժվար չէ կիրակի վաղ առավոտյան արթնանալ,- ասաց Հայկը (9 տ.),- քանի որ ես հիշում եմ, որ Աստված է ինձ կանչում դեպի եկեղեցի և հաճույքով արթնանում եմ»: Վոլոդյան (12 տ.) և Ալեքսն (12 տ.) էլ նշեցին, որ ինչ սկսել են ծառայել եկեղեցում, իրենց վարքը դրական առումով փոխվել է և այդ մասին վկայում են թե՛ եկեղեցում և թե՛ ընտանիքում:

Տղաների մեծ մասը ցանկանում է շարունակել ծառայությունը եկեղեցում՝ հետագայում քահանա ձեռնադրվելու մեծ երազանքն ունենալով:

 

 

Կարինե Սուգիկյան

25.12.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․