Գրքեր

Երբ կյանքը լի է Սուրբ Հոգու պտուղներով

Նոյեմբերի 19-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Կարապետյան Էլմիրային (35 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանի ընտանիքը: Էլմիրան իր յոթ զավակների հետ բնակվում է Էջմիածնի շրջանի Ակնաշեն գյուղի Թումանյան 3 հասցեում: Ընտանիքի հայրը վեց ամիս առաջ մահացել է, և բազմազավակ ընտանիքը մի շարք խնդիրների առջև է կանգնել: Միայն կերակրողին կորցնելու դեպքում կենսաթոշակ և ընտանեկան նպաստ ստացող ընտանիքը դժվարությամբ է կարողանում հոգալ իր ամենօրյա կարիքները:

«Հնազանդ ու աշխատասեր զավակներ ունեմ, օգնում են ինձ թե՛ տնային և թե՛ այգին մշակելու գործերում, փոքրին են խնամում, դասերն ինքնուրույն են պատրաստում: Հինգ դուստրերիցս ավագները՝ Վառվառան (13 տ.) և Գայանեն (11 տ.) պարի խումբ են հաճախում և ցանկանում են պարուհի ու վարսահարդար դառնալ, մյուս դուստրս՝ Անին (10 տ.), շախմատի խումբ է հաճախում և ցանկանում է բժշկուհի դառնալ, տղաս սիրում է սպորտով զբաղվել: Շնորհակալ եմ բոլոր այն անձանցից, ովքեր, հաշվի առնելով իմ ընտանեկան վիճակը, խմբերի վարձերը մասամբ և ամբողջովին զեղչեցին: Շնորհակալ եմ աջակից Վարդանյան ընտանիքին՝ մեզ օգնելու համար, նաև Զորավոր Ս. Աստվածածին եկեղեցու համայնքին, որ տաք հագուստ տրամադրեց մեզ»,- ասաց Էլմիրան:

Եկեղեցու հայրերից Տերտուղիանոսն ասել է. «Դու մարդ ես, ճանաչում ես մարդկանց ըստ նրանց արտաքինի և մտածում ես այնպես, ինչպես տեսնում ես, իսկ տեսնում ես միայն այն, ինչ թույլ են տալիս քո աչքերը: «Աստված այնպես չի նկատում, ինչպես նկատում են մարդիկ. մարդիկ երեսին են նայում, իսկ Աստված՝ սրտին» (Ա Թագ. 16:7),- կարդում ենք Սուրբ Գրքում»:

Աստված չի նայում նրան, թե մարդն ինչ պաշտոն ունի, կիրթ է, թե՝ ոչ, հարգում են նրան, թե՝ ոչ, այլ նայում է մարդու սրտին: Այլ խոսքերով՝ Աստված նայում է ոչ թե մարդու արտաքին վիճակին, այլ ներքին հոգևոր զարգացմանը: Իսկ մարդու հոգին աճում է և զարգանում, երբ առաջնորդվում է Սուրբ Հոգով և լի է Սուրբ Հոգու պտուղներով, որոնք են՝ սեր, ուրախություն, խաղաղություն, համբերատարություն, ազնվություն, բարություն, հավատարմություն, հեզություն, ժուժկալություն (Գաղ. 5:22-23):

 

Կարինե Սուգիկյան

19.11.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․