27 Փետրվար, Եշ, Մեծ Պահքի Դ օր

Գրքեր

Երբ փորձում ենք միասին սիրել

Զորավոր Ս. Աստվածածին եկեղեցու համայնքը, «Արև-երեխաներ» ՀԿ-ի հետ համատեղ, սոցիալական ծրագրերի շրջանակներում, շարունակում է աջակցել Դաունի համախտանիշ ունեցող երեխաներին: Փետրվարի 22-ին Զորավոր Ս. Աստվածածին եկեղեցու հոգևոր հովիվ Տեր Գրիգոր քահանա Գրիգորյանն այցելեց Փանոսյան ընտանիքին, ուր մեծանում է արև Զորիկը (2 տ.): Փանոսյան ընտանիքը բնակվում է Օտյան 12 հասցեում: Ընտանիքի մայրը՝ Լիաննա Պետրոսյանը (33 տ.), ասաց, որ Զորիկը տարբեր բուժումներ է ստանում, բայց դեռ չի կարողանում քայլել, քանի որ թույլ մկանային համակարգ ունի: Փանոսյան ընտանիքն այժմ ֆինանսական դժվարության մեջ է գտնվում և փորձում է իր ամենօրյա կարիքները մասամբ լուծել ընտանեկան նպաստի և Զորիկին տրամադրվող հաշմանդամության գումարներով:

Արև Զորիկն իր ընտանիքի ուրախությունն է, նա անմիջապես ընկերացավ Տեր Գրիգորի հետ: Ընտանիքի հետ զրույցից հետո Տեր Հայրը բժշկության աղոթք կարդաց և ընտանիքին հանձնեց դրամական օգնություն (100 ԱՄՆ դոլար), որ տրամադրել էին ամերիկահայ տեր և տիկին Գյուչուքիանները և սննդի փաթեթ՝  «Արև-երեխաներ» ՀԿ-ի կողմից տրամադրած: Ընտանիքն իր երախտագիտությունը հայտնեց աջակից Գյուչուքիան ընտանիքին, եկեղեցու համայնքին և «Արև-երեխաներ» ՀԿ-ին՝ ուշադրության և հոգածության համար:

Եկեղեցու հայրերից երանելի Իոանն Կրոնշտադտացին իր կյանքով էր քարոզում ողորմության առաքինության մասին, նրա խոսքը կենդանի գործ էր: Իր օրագրի գրառումներից մեկում կարդում ենք. «Նայելով աշխարհին՝ մենք ամենուր տեսնում ենք աստվածային առատաձեռնությունը. երկրի մակերեսը կարծես ամենաշքեղ սեղանը լինի՝ պատրաստված առատաձեռն տիրոջ կողմից, ով սիրում է լիություն և բազմազանություն, երկրի ընդերքը ևս ծառայում է մարդուն: Աստծո առատաձեռնությանը թիվ ու սահման չկա: Նայե՛ք, թե ինչ է տալիս երկիրը ամռանն ու աշնանը: Այսպես և ամեն քրիստոնյա պետք է նմանվի Աստծուն և օրինակ վերցնի Նրա առատաձեռնությունից, որպեսզի իր սեղանն էլ բաց լինի մարդկանց առջև, քանի որ ագահը թշնամի է Աստծուն: Նայի՛ր մրջյուններին, մեղուներին, աղավնիներին, ոչխարներին, որքան համերաշխ են նրանք: Նայի՛ր ձկան վտառներին, որ սիրում են միասին լողալ, որքան համերաշխ են նրանք: Մտածի՛ր, թե ինչ նախանձախնդրությամբ են նրանք պաշտպանում, օգնում և սիրում միմյանց, և մարդը, որ չի ապրում սիրո մեջ, պետք է օրինակ վերցնի անբաններից»:

 

Կարինե Սուգիկյան

22.02.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․