Գրքեր

Երկնքի Արքայությունը ձեռք են բերում ուժեղները

Մեր անմահ հոգին մշտապես գործում է և չի կարող անգործ մնալ, կամ բարին է գործում, կամ չարը, այնտեղ կամ ցորեն է աճում, կամ որոմ: Ամեն բարիք Աստծուց է, և աղոթքն այն միջոցն է, որով հաղորդակից ենք դառնում Տիրոջ կողմից պարգևած բարիքներին: Հոգու խորքից, ջերմեռանդ և անկեղծ աղոթողը ստանում է Տիրոջից օրհնություն բարին գործելու, իսկ նա, ով չի աղոթում, ինքնակամ իրեն զրկում է հոգևոր պարգևներից՝ դատապարտելով իրեն հոգու սառեցմանը: Ջերմեռանդ սրտով աղոթողի սրտում Աստված աճեցնում է բարի մտքերի և գործերի ցորեններ: Ուստի անհրաժեշտ է ջանադրաբար հետևել սրտի անդաստանին. արդյո՞ք այնտեղ չեն աճել մեղքերի որոմներ:

«Կամար» ստոմատոլոգիական կենտրոնի աշխատակիցների համար կարևոր է՝ որպես Հայ Առաքելական Ս. եկեղեցու զավակներ, իրենց սրտի անդաստանից ներս արդյունավորել առաքինության սերմեր: Կենտրոնի աշխատակիցները հաճախակի այցելում են Զորավոր Ս. Աստվածածին եկեղեցի, մասնակից լինում Ս. Պատարագներին: Ամանորի ու Ս. Ծննդյան տոներին ընդառաջ՝ նրանք եկեղեցու հոգևոր հովիվ Տեր Գրիգոր քահանա Գրիգորյանին փոխանցեցին 100 000 դրամ: Տեր Հայրը դեկտեմբերի 31-ին գումարը հանձնեց Գոռ Գրիգորյանին, ով իր որդու՝ 9-ամյա Հայկի հետ սպասավորում է Զորավոր Ս. Աստվածածին եկեղեցում: Գումարը տրվեց նրանց որպես խրախուսանք իրենց ծառայասիրության դիմաց: Գոռ Գրիգորյանն իր երախտագիտությունը հայտնեց Տեր Գրիգորին և կենտրոնի աշխատակիցներին:

Սրտի անդաստանն այն վայրն է, որ մշտական խնամքի կարիքն ունի: Հարկավոր է այնտեղ արմատավորել հավատի, հույսի և սիրո առաքինության սերմեր՝ արդյունավորելով նրանք աղոթքով, համբերությամբ, բարի գործերով, խուսափելով անգործությունից, քանի որ մարդկության թշնամին հենց այդ ընթացքում է մեծ եռանդով իր որոմները ցանում՝ մի գիշեր, երբ ամեն մարդ քնի մեջ էր, նրա թշնամին եկավ, որոմ ցանեց ցորենի մեջ և գնաց (Մատթեոս 13:25): Կարևոր է մտքում ամրագրել այն կարևոր հանգամանքը, որ բարին գործելու համար ջանք ու եռանդ է անհրաժեշտ, քանի որ Երկնքի Արքայությունը ձեռք բերելու համար ուժ են գործադրում, և ուժեղները ձեռք են բերում այն (Մատթեոս 11:12):

 

 

Կարինե Սուգիկյան

30.12.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․