Գրքեր

Եթե մեռնել ես ուզում՝ չես մեռնում

- Հա՛յր, վերջնական ախտորոշումն արված է: Ձեր ուռուցքը չարորակ է: Դա քաղցկեղի վատագույն ձևերից մեկն է:

- Ինձ մի թաշկինակ բեր, որ պար բռնեմ: «Մնաս բարով դժբախտ աշխարհ, առողջ եղիր» պարն եմ պարելու: Կյանքումս ոչ մի անգամ չեմ պարել, բայց այժմ ուրախությունից պարելու եմ, որ մահը մոտ է:

- Հա՛յր, բժիշկն ասաց, որ Ձեզ նախ ճառագայթման են տանելու, որպեսզի ուռուցքը թուլացնեն, հետո վիրահատություն կանեն:

- Պարզ է: Նախ ավիացիան է ռմբակոծելու, հետո բանակը հարձակման կանցնի: Ահա թե ինչ, ավելի լավ է ես (միանգամից) վերև գնամ ու պատմեմ ձեզ, թե ինչ է այնտեղ կատարվում… Ոմանք, նույնիսկ տարեցները, վշտանում են, երբ բժիշկն ասում է «մեռնելու ես« կամ «հիսուն տոկոսի հույս կա, որ կապրես»: Նրանք ապրել են ուզում: Իսկ հանուն ինչի՞: Զարմանալի բան է: Եթե երիտասարդ մարդն է ուզում ապրել, դա գոնե հասկանալի է, ինչ-որ արդարացում կա: Բայց, եթե ծերունին է ցանկանում ողջ մնալ, ապա ես դա չեմ հասկանում: Հասկանում եմ, եթե նա բուժվում է, որպեսզի ի վիճակի լինի ինչ-որ կերպ ցավին դիմանալու: Այսինքն նա չի ուզում, որ իր կյանքը երկարի, բայց ուզում է ի վիճակի լինել գոնե մի փոքր ցավին դիմանալու և իր մասին հոգ տանելու՝ մինչև մահանալը: Այդպիսի բուժման մեջ իմաստ կա:

- Հա՛յր, մենք խնդրում ենք Աստծուն, որպեսզի Նա երկարացնի Ձեր կյանքը:

- Ինչի՞ համար: Մի՞թե սաղմոսում գրված չէ, որ յոթանասունը մեր կյանքի ժամկետն է (Սղմ. 89:10):

- Սակայն սաղմոսերգուն ավելացնում է. «կամ առավելագույնը՝ ութսուն տարի»…

- Այո, բայց հետո նաև այն մասին է ասում, որ. «որոնց մեծ մասն անցնում է ցավով ու հեծությամբ»: Այնպես, որ ավելի լավ է հանգիստ գտնել մյուս կյանքում:

- Հա՛յր, իսկ հնարավո՞ր է, որ խոնարհ մարդը, հոգևոր առումով, իրեն պատրաստ չզգա մյուս կյանքի համար և ցանկանա մի քիչ էլ ապրել, որպեսզի պատրաստվի:

- Դա լավ է, իհարկե: Բայց այդպիսի մարդը որտեղի՞ց գիտի. միգուցե, եթե նա ավելի երկար ապրի, ապա ավելի վատ լինի:

- Հա՛յր, իսկ երբ մարդն ընկերանում է՝ հաշտվո՞ւմ է մահվան հետ:

- Ե՞րբ: Եթե մարդու մեջ Քրիստոսն է ապրում, ապա մահը նրա համար ուրախություն է: Սակայն, ճիշտ չէ մահվան համար ուրախանալ, քանի որ հոգնել ես կյանքից: Երբ մարդն ուրախանում է մահվան համար, բառի լավ իմաստով, ապա մահը հեռանում է նրանից ու գնում վախկոտ մեկի մոտ: Եթե դու մեռնել ես ուզում՝ չես մեռնում: Բարօրության մեջ ապրող մարդը վախենում է մահվանից, որովհետև աշխարհիկ կյանքը հաճույք է պատճառում նրան և նա չի ցանկանում մահանալ: Եթե որևէ մեկն այդ մարդուն մահվան մասին է ասում, ապա նա պատասխանում է. «Երեք անգամ փայտին թխկացրու»: Իսկ ահա նա, ով տառապում է, ցավ է ապրում և այլն, մահը ազատագրում է համարում և ասում է. «Ի՜նչ ափսոս, որ մահը դեռ չի եկել ինձ տանելու… Երևում է ճանապարհին ինչ-որ խոչընդոտի է հանդիպել»:

Քչերն են մահ ցանկանում: Մարդկանց մեծամասնությունը ուզում է այս կյանքում հասցնել ինչ-որ բան ավարտել և այդ պատճառով էլ չի ցանկանում մահանալ: Սակայն Բազումողորմ Աստված այնպես է դասավորում, որ մարդը մահանում է այն ժամանակ, երբ հասուն է դառնում: Բայց ինչ ուզում ես ասա, հոգևոր մարդը՝ լինի երիտասարդ, թե տարեց, պետք է ուրախանա և՛ ապրելու համար, և՛ մահվան հեռանկարի: Միայն թե պետք չէ մահվան ձգտել, որովհետև դա ինքնասպանություն կլինի:

Այն մարդն ով մահացել է աշխարհի համար և հարություն է առել հոգևոր առումով, մահվան նկատմամբ ամենևին էլ անհանգստություն, վախ կամ տագնապ չունի, որովհետև ուրախությամբ է մահվանը սպասում: Որովհետև Քրիստոսի մոտ է գնալու և Նրա հետ է ուրախանալու: Սակայն նա այս կյանքում էլ է ուրախանում, որովհետև այս կյանքում ևս Քրիստոսի հետ է ապրում և դեռևս երկրի վրա ապրելով՝ զգում է դրախտային ուրախության մի մասը: Այդպիսի մարդն իրեն հարց է տալիս, թե արդյոք Դրախտում ավելի մեծ ուրախություն կա՞, քան այն է, ինչ նա երկրի վրա ապրելով է զգում: Այս մարդիկ բարեպաշտությամբ և անձնվիրությամբ են ճգնում: Աչքի առաջ մահն ունենալով և ամեն օր նրա մասին մտածելով՝ նրանք ավելի հոգևոր կերպով են պատրաստվում, ավելի մեծ անվեհերությամբ են ճգնում ու հաղթում են ունայնությունը:

 

 

Պաիսիոս Աթոսացու «Ընտանեկան կյանք» գրքից

Ռուսերենից թարգմանությունը՝ Էմիլիա Ապիցարյանի

06.09.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․