10 Օգոստոս, Բշ, Աստվածածնի պահքի Ա օր

Գրքեր

Գիտությունից մինչև հավատք. բանախոսություններ երիտասարդների համար

Սույն թվականի օգոստոսի 29-ից Զորավոր Սուրբ Աստվածածին եկեղեցու կից սրահն ամեն շաբաթ «Զորավոր» երիտասարդաց հոգևոր միության անդամների համար վերածվում է հետաքրքիր վերլուծությունների և քննարկումների մի վայր: Այս անգամ «Եկեղեցին մենք ենք» ծրագրի շրջանակներում երիտասարդները հնարավորություն ունեին առնչվելու «Գիտություն և հավատք» խորագիրը կրող բանախոսություններին: Համայնքի անդամ կենսաբան-ֆիզիկոս Խաչիկ Ստամբուլցյանն երիտասարդների հետ քննարկել է այնպիսի թեմաներ, ինչպիսիք են՝ էվոլյուցիոն գաղափարի և տարբեր ցեղերի մեջ թափառող գաղափարների մասին, որ արտահայտվել են հեքիաթներում, օրինակ, բոլոր ցեղերի մոտ բացասական համարվող օձի, կենաց ծառի, կենաց ջրի մասին, տեսիլքի և հալյուցինացիայի տարբերությունների, 7 և 13 թվերի մասին: Նպատակը բանախոսությունների, ըստ պրն. Ստամբուլցյանի, հանգելն է այն ճշմարտությանը, որ գիտության ճշգրիտ ուսումնասիրությունները վերջ ի վերջո մարդուն մոտեցնում են Աստծուն, Աստվածաշնչին և ոչ հեռվացնում:

«15-րդ դարից առ այսօր բնագիտության զարգացումը, բնափոփոխության և էվոլյուցիայի ճանապարհով տեղի ունեցող պրոցեսները մարդկությանը հեռվացրել են Աստծուց՝ հայտարարելով Աստվածաշնչի և գիտության իրարամերժ լինելը: Այնինչ գիտության ասպարեզի նշանավոր մարդկանցից շատերն իրենց փորձառությամբ բազմիցս փաստել են գիտության ու Աստվածաշնչի միջև եղած հարմոնիայի մասին»,- նշեց պրն. Ստամբուլցյանը:

Երիտասարդաց միության անդամ Լիլիթի համար բանախոսություններն առավել պարզեցին գիտության և հավատքի միջև եղած իրական, ճշմարտացի ներդաշնակությունը:

«Գիտություն և հավատք» խորագիրը կրող հանդիպումները դեռ կշարունակվեն: Մայրիշխանություն, կռապաշտության սկզբնավորումը, հայ ազգի ծագումը, այս և այլ թեմաների դեռ կանդրադառնան և կքննարկեն երիտասարդաց միության անդամները:

Ծանոթանանք գիտության մեծ մշակների վկայություններից մի քանիսին, որ ժխտում են գիտության և հավատքի միջև եղած թվացյալ հակադրությունը: Նոբելյան մրցանակի դափնեկիր, ֆրանսիացի քիմիկոս Պոլ Սաբատիեն ասում էր. «Բնական գիտություններն ու կրոնը միմյանց են հակադրում միայն այն մարդիկ, ովքեր վատ գիտեն թե՛ մեկը, թե՛ մյուսը»:

«Ինչ ուղղությամբ էլ, որ ուսումնասիրենք, ամենուր մենք հանդիպում ենք Ամենակարող Արարչի գոյության ապացույցին» (Անգլիացի երկրաբան, ժամանակակից երկրաբանության հիմնադիր Շ. Լիել):

«Լուրջ բնագետը չի կարող ժխտել Աստծո գոյությունը: Նա, ով կարողացել է ողջ խորությամբ թափանցել Աստվածային դաշտ և հիանալ Նրա մեծագույն իմաստությամբ, ապա չի կարող չխոնարհվել այդ Բարձրագույն Ոգու առջև» (Գերմանացի աստղագետ, լուսնի առաջին քարտեզի հիմնադիր Գ. Մեդլեր):

 

 

Կարինե Սուգիկյան

03.10.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․