3 Հունիս, Դշ, Դ օր Հոգեգալստյան, Պահք

Գրքեր

«Հնարավոր չէ, որ աղի աղբյուրից քաղցր ջուր բխի»

«Տեր Աստված եմ, գթացող և ողորմած, համբերատար, բարեգութ ու ճշմարիտ, որ արդարությունն է պաշտպանում, Իր ողորմածությունն է ցուցաբերում հազարավոր սերունդների հանդեպ, վերացնում անօրենությունները, անիրավություններն ու մեղքերը...» (Ելք 34: 6-7),- ասաց Տերը, երբ անցնում էր Մովսես մարգարեի առջևից: Առաքինի կյանքով ապրող քրիստոնյան իր կյանքով է վկայում իր Աստվածանման լինելու, իր հոգու բարության ու գեղեցկության մասին: Բարի սիրտ ու կամք ունեցող մարդուց բարին է բխում, «հնարավոր չէ, որ աղի աղբյուրից քաղցր ջուր բխի» (Հակոբ. 3:12): Բարու մեջ հարատևելու համար քրիստոնյան որևէ գանձից առավել պետք է պահպանի իր սիրտը, «որովհետև նրանից է բխում կյանքի աղբյուրը» (Առակ. 4:23): Սուրբ Գրքի համաձայն՝ սիրտը համարվում է մարդու թե՛ ֆիզիկական բնության և թե՛ հոգևոր ու բարոյական կյանքի կենտրոնը: Քրիստոնեական հասկացողությամբ սիրտը որպես խիղճ է ընկալվում: Քրիստոնյայի կոչումն է առավելագույնս մաքուր պահել խիղճը և ապաշխարությամբ, աղոթքով ու բարի գործերով պահպանել կյանքի աղբյուրը, որն, ըստ Սուրբ Գրքի, արդարի ձեռքին է (Առակ. 10:11):

Եկեղեցու սուրբ հարկից ներս միավորված բարի մարդկանց գործունեության բարի հետևանքներն են սոցիալական ծրագրերը, որ նպատակ ունեն պահպանելու կյանքի հորդաբուխ աղբյուրը: Հունիսի 7-ին Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը, Զորավոր Ս. Աստվածածին եկեղեցու և «Արև-երեխաներ» ՀԿ-ի սոցիալական ծրագրերի շրջանակում, Աննա Գրիգորյանին (38 տ.) հանձնեց դրամական օգնություն (50 000 դրամ), որ տրամադրել էր համայնքի անդամ Անահիտ Հովսեփյանը: Աննան իր ամուսնու և երեք զավակների հետ վարձակալությամբ բնակվում է Բաբաջանյան 1, բն. 28 հասցեում: Գրիգորյան ընտանիքի միջնեկ զավակը՝ Ալեքսը (6.5 տ.), Դաունի համախտանիշ ունի: Ընտանեկան ջերմ մթնոլորտում է մեծանում արև Ալեքսը, նա երկրորդ դասարանում է սովորում: Մայրիկը պատմեց, որ Ալեքսի խոսքը հստակ չէ, և նա հաճախելու է «Արև-երեխաներ» ՀԿ-ի կողմից «Երևան իմ սեր» հիմնադրամի շենքում կազմակերպած հատուկ մանկավարժների դասապարապմունքներին: Գրիգորյան ընտանիքը ֆինանսական խնդիրներ ունի, Աննան ասաց, որ ամուսնու վաստակած աշխատավարձով դժվարանում են տան և կոմունալ վարձերը վճարել: Նա շնորհակալություն հայտնեց աջակից անձին ու «Արև-երեխաներ» ՀԿ-ին՝ իր ընտանիքի հանդեպ ցուցաբերած ուշադրության և հոգածության համար:

 

Կարինե Սուգիկյան

07.06.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․