Հոգետես և սքանչելագործ հայրերի մասին

Ալեքսանդրիայում գնացինք աբբա Թեոդորի մոտ, որ Փարո­նում էր` սուրբ Սոֆիայի մոտ: Եվ ծերը պատմեց մեզ ու ասաց. «Հրա­ման ստացա մեր սուրբ հայր Թեոդոս Անապատականից՝ մեր Քրիստոս Աստծո սուրբ քաղաքը գնալու, և այնտեղ գտա մի ծերի, որի անունն էր Քրիստափոր, ազգությամբ` հռոմեացի: Ծունր դրի նրա առաջ և ասացի. «Շնո՛րհ արա, հա՛յր, և պատմի՛ր քո երիտասարդության գոր­ծերը»: Եվ մեծ սփոփանք արեց ծերը, պատմեց ինձ և ասաց. «Երբ մեծագույն կրոնական ջերմեռանդության հասա, սահմանված կար­գով ցերեկները փակվում էի, իսկ գիշերները գնում էի սուրբ Թեոդոսի այրը: Այնտեղ էին գալիս և ուրիշ հայրեր և գիշերային աղոթք էին կատարում, և ովքեր գալիս էին այս այրը` հարյուր անգամ ծնրադ­րում էին Աստծուն: Այրն ուներ տասնութ աստիճան, և այնտեղ իջ­նող եղբայրները մնում էին այնքան, մինչև ժամհարի կոչնակը չէր ազդարարում օրհներգության ժամը, ապա գնում էինք հասարակաց վանք: Աղոթքի համար այս այրն իջնելը կատարում էինք մեծ ժուժկա­լությամբ և հոժարակամությամբ: Մի օր զարմանալի տեսիլք երևաց ինձ. իբր թե այրի ողջ հատակին կանթեղներ էին դրված, և նրանցից մի մասը վառվում էր, իսկ մյուսները չէին վառվում: Եվ երկու մարդու տեսա` քղամիդ հագած և գոտևորված, որոնք պատրաստում էին կան­թեղները: Այնժամ նրանց ասացի. «Ինչո՞ւ դրեցիք կանթեղներն այս­տեղ, քանզի այրում տեղ չի լինի նրանց, որոնք գալու են աղոթքի»: Եվ նրանք ասացին. «Այս կանթեղները հայրերինն են»: Ես դարձյալ ասացի. «Ինչո՞ւ ոմանք վառվում են, իսկ ոմանք` ոչ»: Եվ նրանք պա­տասխանեցին. «Եթե կամենան` մնացածներն էլ կվառվեն»: Այնժամ ասացի. «Ի սեր Աստծո, ասացե՛ք, իմ կանթեղը վառվո՞ւմ է, թե՞ ոչ»: Եվ նրանք ասացին. «Աղոթի՛ր, և մենք կվառենք այն»: Ասացի. «Դեռ էլի՞ պետք է աղոթեմ, իսկ մինչև այժմ ի՞նչ էի անում»: Եվ այս խոսքի վրա սթափվեցի և ոչ ոքի չտեսա ինձ մոտ: Այնժամ ինքս ինձ ասացի. «Քրիստափո՛ր, եթե կամենում ես ապրել, առավել պետք է ճգնես»: Եվ հաջորդ օրը հեռացա վանքից, գնացի Սինա լեռը` ոչինչ չվերցնե­լով ինձ հետ՝ բացի նրանից, ինչ հագել էի: Եվ այնտեղ հիսուն տարի ճգնելուց հետո ինձ ձայն եկավ և ասաց. «Քրիստափո՛ր, գնա՛ քո միա­բանությունը, որտեղ բարվոք ճգնել ես, որպեսզի այնտեղ փոխվես քո հայրերի մոտ»: Եվ ահա եկա այստեղ»: Եվ երբ այս ամենը պատմեց ինձ, քիչ անց ննջեց ի Տեր»:

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016