Հոգետես և սքանչելագործ հայրերի մասին

Ոմն ծեր բնակվում էր եղեգնուտի վանքում, որ սուրբ Հորդա­նանի գետի մոտ է: Նրա անունը Կիրակոս էր, և նա Աստծո մեծ այր էր: Նրա մոտ եկավ Տարա երկրից մի եղբայր` Թեոփանոս անունով: Սա կամենում էր ծերին հարցնել պոռնկության խորհուրդի մասին, և ծերն սկսեց պարկեշտ խոսքերով նրա մեջ իմաստություն սերմանել: Եվ եղ­բայրը, մեծ օգուտ քաղելով նրանից, այսպես ասաց նրան. «Տե՛ր աբբա, ես իմ երկրում հաղորդվում էի նեստորականների հետ և այդ պատ­ճառով եկա բնակվելու քեզ մոտ»: Եվ երբ լսեց ծերը նեստորականնե­րի մասին, տրտմեց եղբոր կորստական լինելու համար: Ապա սկսեց իմաստության կոչ անել նրան և աղաչում էր, որ հեռու մնա այդպիսի վտանգավոր հերձվածից և գա կաթողիկե և առաքելական սուրբ եկե­ղեցի: Այս ևս ասաց նրան. «Չկա այլ փրկություն, բացի ուղիղ իմաս­տությունից և ճշմարիտ հավատից, թե՝ Սուրբ Կույս Մարիամը Աստ­վածածին է»: Եվ եղբայրն ասաց. «Այդպես, տե՛ր աբբա, ովքեր հերձ­վածի մեջ էին, ասում էին՝ եթե մեզ հետ չհաղորդվես, չես ապրի: Եվ ես` ողորմելիս, ինչ անեի` չգիտեի: Աղաչենք Տիրոջը, որ ինձ համար բացահայտի` ո՛րն է ճշնարիտ հավատը»: Ծերն ուրախությամբ ընդու­նեց եղբոր խոսքերը և ասաց նրան. «Նստի՛ր քո այրում, և հուսանք առ Աստված, որ մեզ կհայտնի ճշմարտությունը»: Ապա ծերը խնդրեց եղբորը, որ իր այրը գա: Իսկ ինքը ելավ­ գնաց Մեռյալ ծովի եզերքը և եղբոր համար աղաչում էր Աստծուն: Եվ երկուշաբթի օրը՝ իններորդ ժամին, եղբայրը տեսավ ահազդու կերպարանքով մեկին, որն ասում էր իրեն. «Ե՛կ և տե՛ս ճշմարտությունը»: Վերցրեց նրան և բերեց մի խավար տեղ, ուր զարհուրելի կրակ էր, իսկ կրակի մեջ էին Նեստորը, Եվտիքեսը, Ապողինարը և այլոք: Եվ նրան երևացողն ասաց. «Այս տեղը պատրաստված է հերետիկոսների և նրանց խոսքերին հետևողների համար: Եթե քեզ հաճելի է մնալ այդ տեղում, մնա՛ այդ քո հավատին, իսկ եթե չես կամենում այդ փորձն ունենալ, գնա՛ սուրբ կաթողիկե և առաքելական եկեղեցի, որ ծերն է քարոզում, քանզի եթե նույնիսկ բոլոր առաքինությունները ստանա մարդ, բայց ուղիղ չդավանի, այս տեղում կմնա»: Այս խոսքերի վրա եղբայրն սթափվեց, և երբ ծերը եկավ, պատմեց նրան` ինչ որ տեսավ, և եկավ հաղորդվելու սուրբ կաթողիկե եկեղեցում: Նա եղեգնուտում՝ ծերի մոտ մնաց չորս տարի և ննջեց խաղաղությամբ:

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016