Հոգին գեղեցկանում է ողորմության առաքինությունից

Աստված սեր է և Նա մշտապես գործում է: Քրիստոնյայի համար մեծ արժանիք է Աստծո պատկերը կրելը, ուստի այդ պատկերը կրողի խոսքն էլ պետք է գործով արտահայտվի, քանի որ հավատքը կենդանի է միայն գործով (Հակոբոս 2:26): Ճշմարիտ հավատը դա կենդանի և ստեղծարար գործն է: Սբ. Պողոս առաքյալը կողոսացիներին ուղղված իր նամակում հորդորում է՝ ասելով, որ Քրիստոսի խոսքը թող ձեր մեջ բնակվի իր ողջ հարստությամբ և ինչ էլ որ անեք, խոսքով թե գործով, միշտ արե՛ք Տեր Հիսուսի անունով՝ Նրա միջոցով գոհություն հայտնելով Հայր Աստծուն (Կողոսացիներ 4:16-17):

Ի գոհություն և ի փառս Աստծո՝ Զորավոր Սբ. Աստվածածին եկեղեցու համայնքը շարունակում է իր սոցիալական ծրագրերն իրականացնել՝ այցելելով կարիքավոր ընտանիքների: Հունիսի 6-ին համայնքը հոգևոր հովիվ Տեր Գրիգոր քահանա Գրիգորյանի գլխավորությամբ այցելեց Էջմիածին քաղաքի 59/51 հասցեում բնակվող բազմազավակ կարիքավոր ընտանիքին: Մարտիրոսյան ընտանիքում մեծանում են հինգ տղաներ: Ընտանիքի հայրը՝ Մարտիրոսյան Մովսեսը (53տ.), որպես վարորդ է աշխատել, բայց իր հիվանդության՝ բրոնխիալ ասթմայի սրման պատճառով այժմ ի վիճակի չէ աշխատելու: Նրա կինը՝ Հովհաննիսյան Դիանան (38տ.), նույնպես առողջական խնդիրներ ունի և ինչպես նա ասաց՝ Աստծո շնորհիվ է, որ ապրում ենք: Յոթ հոգուց բաղկացած ընտանիքն իր կարիքները հոգում է Մարտիրոսյան Մովսեսի հիվանդության թոշակի և ընտանեկան նպաստի գումարներով:

Ընտանիքի հետ ջերմ զրույցից հետո Տեր Գրիգորը նրանց հանձնեց ամերիկաբնակ Կարեն Վարդանյանի աջակցությամբ գնված սննդի փաթեթներ, անկողնային ու հիգիենայի պարագաներ և դրամական օգնություն: Մարտիրոսյան ընտանիքն իր շնորհակալությունը հայտնեց Տեր Գրիգորին, համայնքին և աջակից անձին՝ Կարեն Վարդանյանին:

Հոգին գեղեցկանում է ողորմության առաքինությունից և սկսում է փայլել աստվածային շնորհով: Ողորմած մարդն աստվածանման է դառնում և սկսում է ճառագայթել Սիրո մեծ Արեգակից:

Կարինե Սուգիկյան