Գրքեր

Ինչպես երջանկություն գտնել

Գյուղում մի պատանի էր ապրում: Ողջ օրը նստում էր տանն ու ոչինչ չէր անում:

Մի անգամ նա մորը հարցրեց.

- Ինչպե՞ս գտնեմ երջանկությունս:

- Որդի՛ս, գնա դաշտ ու ինչ բռնես, դա էլ քո երջանկությունը կլինի,- պատասխանեց մայրը:

Պատանին դուրս եկավ դաշտ ու տեսավ մի ձիու քուռակ է վազում: Նետվեց նրա ետևից, բայց չհասավ: Թփերի տակից մի նապաստակ դուրս թռավ: Վազեց, որպեսզի բռնի՝ չբռնեց: Տեսավ աղավնի է թռչում, վազեց նրա ետևից, բայց ավաղ, թռավ, հեռացավ:

Նայեց պատանին ու տեսավ մի ագռավ որդեր է փնտրում հողի տակ: Քանի որ ոչինչ չուներ անելու երկարեց ձեռքն ու բռնեց նրան:

- Մի՞թե դու ես իմ երջանկությունը,- հարցրեց ագռավին:

- Ոչ,- պատասխանեց ագռավը,- ինձնից ի՞նչ երջանկություն: Սակայն կարող եմ հուշել, թե ինչպես որսաս երջանկությունդ:

- Ինչպե՞ս,- հարցրեց պատանին:

- Բուրավետ չոր խոտ լցրու բակում, քուռակը կմոտենա խոտն ուտելու ու ինքը կցանկանա քեզ մոտ մնալ: Քաղցր գազար վերցրու ու ցանկապատի մոտ դիր: Նապաստակը վազելուց կտեսնի գազարն ու ձեռնասուն կդառնա: Բակում ցորենի հատիկներ շաղ տուր՝ աղավնին կթռչի կգա ու տանիքիդ տակ բույն կհյուսի:

- Իսկ մի՞թե դա երջանկություն է,- զարմացավ պատանին:

- Իսկ երջանկությունը հետո կլինի: Երբ բակի մոտով մի բարի ու գեղեցիկ աղջիկ կանցնի, կտեսնի, թե ինչպես ես քուռակին, նապաստակին ու աղավնուն կերակրում, կսիրի քեզ ու կհամաձայնվի կինդ դառնալ:

 

«Աստծու արքայությունը դրսից տեսանելի կերպով չի գալիս, և չեն ասի, թե՝ ահավասիկ այստեղ է կամ այնտեղ» (Ղուկ. 17:21, 22)

 

Ռուսերենից թարգմանությունը՝ Էմիլիա Ապիցարյանի 

31.03.21
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․