3 Հունիս, Դշ, Դ օր Հոգեգալստյան, Պահք

Գրքեր

«Կախվածություն ունեցողն առողջանում է՝ իր կյանքում բացահայտելով Աստծուն»

Հարցազրույց հոգեբան, քրիստոնեական հասարակական բարեգործական «Հին Աշխարհ» հիմնադրամի վերականգնողական ծրագրի հիմնադիր և ղեկավար, Ռուս Ուղղափառ համալսարանի դասախոս Ե. Ն. Պրոցենկոյի հետ

Պրն. Պրոցենկո՝ որպես «Հին Աշխարհ» հիմնադրամի վերականգնողական ծրագրի ղեկավար, 23 տարի աշխատում եք ալկոհոլից և թմրադեղից կախվածություն ունեցող անձանց հետ: Պատմեք, խնդրեմ ինչպե՞ս սկսեցիք Ձեր գործունեությունն այս ասպարեզում:

1974 թ-ին ավարտելով համալսարանի հոգեբանության ֆակուլտետը՝ սկզբնական շրջանում նյարդաբանական կլինիկայում աշխատել եմ որպես նեյրոհոգեբան: Հետաքրքիր էր աշխատանքը, բայց այն ամբողջովին կառուցված էր մատերիալիստական տեսակետների հիման վրա: Աշխատանքի ընթացքում ինձ համար պարզեցի, որ մարդկային վարվելակերպի և հոգեբանության մեջ ոչ ամեն ինչ է, որ հնարավոր է այս տեսակետների հիման վրա բացատրել: Հետագայում այլ աշխատանքներ փնտրելով՝ 1987 թ-ին շատ պատահաբար աշխատանքի անցա նարկոլոգիական դիսպանսերում և շատ շուտով ինձ համար պարզեցի, որ չեմ կարողանում օգնել ինձ դիմող հիվանդներին: Սկսեցի փնտրել, թե աշխարհում ինչ մեթոդներով են փորձում օգնել թմրադեղից կախվածություն ունեցողին: Փնտրտուքների արդյունքում տեղակացա, որ շատ երկրներ այս բնագավառում մեծ հաջողություններ են գրանցել: Սկսեցի ծանոթանալ նրանց փորձին, կոնֆերանսների մասնակցեցի, ստաժավորման մեկնեցի ԱՄՆ, որտեղ տարբեր վերականգնողական կենտրոններում կես տարի որպես շահառու վերականգնողական ծրագրերի մասնակցեցի՝ ծանոթանալով նրանց ներքին աշխատանքներին: Եվ վերադառնալով Ռուսաստան՝ 1992թ-ից արդեն սկսեցինք մեր գործունեությունը: Սկզբնական շրջանում ամենօրյա հանդիպումներ էինք կազմակերպում կախվածություն ունեցող անձանց համար, իսկ տասը տարի անց համապատախան ծրագրերով սկսեցինք աշխատել արդեն մեր կողմից հիմնած ստացիոնար կենտրոնում:

Ինչո՞ւ է հիմնադրամը կոչվում «Հին Աշխարհ»:

Այն աշխատանքային ձևերն ու մեթոդները, որոնցով մենք աշխատում ենք ամերիկյան են՝ նկատի ունեմ «12 քայլ» ծրագիրը: Ամերիկան կոչվում է նոր աշխարհ: Իրականում այս ծրագրերի հիմքը և մոտեցումը քրիստոնեական է, իսկ քրիստոնեությունն ԱՄՆ-ում չի ծագել, այլ հին աշխարհում, այդ պատճառով հիմնադրամի անվանումն ընտրվեց «Հին Աշխարհ»:

Կարելի՞ է թմրամոլությունը և ալկոհոլամոլությունը համարել հոգևոր հիվանդություն:

Թմրամոլությունն ու ալկոհոլամոլությունը հիվանդություն է, որ ունի հոգևոր հիմք, թեև այն կազմված է նաև կենսաբանական և սոցիալական բաղադրիչներից:

Ինչպե՞ս կախվածություն ունեցող անձի մոտ արթնացնել բուժման ցանկություն:

Մարդն ի վիճակի չէ դա անել, բայց Աստված կարող է: Կարևորը չխանգարել կախվածություն ունեցողին, իսկ դա շատ հաճախ անում են հարազատները:

Ըստ հիմնադրամի վերականգնողական ծրագրի՝ բուժման ընթացքում հոգևոր ի՞նչ աջակցություն է ստանում թմրադեղերից և ալկոհոլից կախվածություն ունեցող անձը և հոգևորականներն ի՞նչ մասնակցություն են ունենում ծրագրին:

Բոլոր ինֆորմացիոն բլոգներում բավականին շատ նյութեր կան վերականգնողական ծրագրերի և քրիստոնեության կապի մասին: Քրիստոնեության մասին մենք շատ հաճախ ենք պատմում կենտրոնի այցելուներին, քանի որ շատերի համար այն ուղղակի կրոն է և ոչ թե ուղի, որ տանում է դեպի Աստված: Կենտրոնը սերտ համագործակցության մեջ է եկեղեցու հետ և ստացիոնար կենտրոնը, գտնվելով վանքի հարևանությամբ, յուրաքանչյուր շահառուի հնարավորություն է տալիս ցանկության դեպքում մասնակցել եկեղեցական արարողություններին, հոգևորականի հետ հանդիպել և զրուցել: Վերականգնողական ծրագրերին նաև հրավիրում ենք հոգևորականների, ովքեր տարբեր թեմաների շուրջ զրույցներ են անցկացնում շահառուների հետ:

Բուժվողների մոտ նկատելի՞ է հոգևոր աճ:

Կենտրոնն ամեն կերպ նպաստում է շահառուների հոգևոր աճին: Եվ կախվածություն ունեցողն առողջանում է, երբ իր կյանքում բացահայտում և գտնում է Աստծուն: Հակառակ պարագայում առողջանալու մասին խոսք լինել չի կարող, եթե անգամ շահառուն երկար ժամանակ ալկոհոլ կամ թմրադեղ չի օգտագործել:

ԱՀԹ «Ցերեկային կենտրոն»-ի հետ ինչպիսի՞ն է լինելու Ձեր համագործակցությունը:

Մեծ հեռանկարներ ունի «Ցերեկային կենտրոն»-ը, ուրախ կլինենք մեր փորձառությամբ օգտակար լինելու և կենտրոնի հետ համագործակցելու համար:

Պրն. Պրոցենկո, ինչպե՞ս ընդունեցիք Հայաստան գալու Ձեր հրավերը:

Առաջին անգամ չէ, որ Հայաստանում եմ, տարիներ առաջ մի քանի ամսով եղել եմ այստեղ: Շնորհակալություն «Ցերեկային կենտրոն»-ի տնօրեն՝ Տեր Գրիգոր քահանա Գրիգորյանին հրավերի համար, մեծ հաճույքով և ուրախությամբ ընդունեցի այն: Երկար տարիների դադարից հետո հետաքրքիր էր կրկին անգամ Հայաստանում գտնվել:

Տարեսկիզբ է, նշեցինք Սբ. Ծննդյան և Աստվածհայտնության տոնը, ի՞նչ կմաղթեք մեր կայքի ընթերցողներին այս կապակցությամբ:

Սբ. Ծնունդը թող հոգու ուրախություն ու խաղաղություն պարգևի յուրաքանչյուրիս և թող այն միշտ լինի մեր կյանքում:

 

Կարինե Սուգիկյան

20.01.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․