Գրքեր

Կատարյալ առաքինության մասին

Ոմն եղբայր հարցրեց հայր Կրոնոսին և ասաց. «Ինձ խրատա­կան խոսք ասա՛, հա՛յր»: Հայր Կրոնոսն ասաց նրան. «Երբ Եղիսեն գնաց այն սոմնացի կնոջ մոտ և իմացավ, որ նա ոչ մեկի հետ գործ չունի, կինը հղիացավ ու ծնեց Եղիսեի` իր մոտ գալու ժամանակ» (Դ Թագ. Դ 8-17): Եղբայրը նրան հարցրեց. «Ո՞րն է այդ խոսքի իմաստն ու զորությունը, հա՛յր»: Ծերը նրան ասաց. «Երբ մարդն արթուն ու զգաստ է լինում, հեռու է պահում իրեն մարդկային խառնաշփոթից և հատում է իր կամքը, այնժամ նրա վրա գալիս է Աստծո Հոգին, և այն­ ժամ կարող է ծնել առաքինություն, քանզի ամուլ է»: Եղբայրն ասաց հայր Կրոնոսին. «Ի՞նչ անեմ մոռացությանս հետ, որը միշտ գերում է իմ խորհուրդները և չի թողնում գիտենալ, մինչև որ գցում է մեղքերի մեջ»: Հայր Կրոնոսն ասաց նրան. «Երբ Իսրայելի որդիների չար գոր­ծերի պատճառով այլազգիները տարան ուխտի տապանակը և քարշ տալով՝ հասցրին Դագոն չաստվածի տունը, այնժամ Դագոնը երես­նիվայր ընկավ նրա առաջ, և այլազգիներն էլ՝ իր հետ» (Ա Թագ. Դ 11, Ե 1-12): «Ի՞նչ է նշանակում դա»,– հարցրեց նրան եղբայրը: Ծերը նրան ասաց. «Երբ դևերն առաջանում են և գերում են մարդու միտքն իրենց պատճառաբանություններով, այնքան են քարշ տալիս նրան, մինչև որ գլխիվայր գցում են չարաչար մեղքերի մեջ: Եվ հենց այդ ժամանակ, երբ միտքը զղջմամբ է համակվում և դառնալով խնդրում է Աստծուն և հիշում հավիտենական տանջանքները, հանկարծակի խորտակվում են այդ ախտերը և աներևութանում, քանզի գրված է. «Եթե դառնաս և հառաչես, այնժամ կապրես և կիմանաս, թե որտեղ ես» (Եսայի Լ 15)»: Հայր Կրոնոսն ասաց դարձյալ. «Եթե Մովսեսը ոչխարները չհաներ Սի­նա լեռը, չէր տեսնի հուրն ու կիզվող մորենին» (Ելից Գ 1-2): Եղբայրն ասաց. «Եվ ի՞նչ է խորհրդանշում մորենին, հա՛յր»: Ծերունին ասաց. «Մորենին մարմնավոր գործերի նշանակն է, ինչպես գրված է. «Երկն­քի Արքայությունը նման է ագարակում թաքցրած գանձի» (Մատթ. ԺԳ 44)»: Եղբայրն ասաց ծերին. «Ինչպես երևում է, առանց մարմնավոր տքնության մարդը չի կարող Աստծուց պատվի արժանանալ»: Ծերն ասաց. «Չէ՞ որ գրված է. «Նայեցե՛ք մեր հավատի առաջնորդ և կա­տարող Հիսուսին, որ հանուն հանդերձյալ փառքի խաչի համբերեց» (Եբր. ԺԲ 2), իսկ Դավիթն էլ ասում է. «Չեմ տա քուն իմ աչքերին և ոչ նինջ` իմ արտևանունքներին» (Սաղմ. ՃԼԱ 4)»:

 

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016

20.05.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․