Գրքեր

Խոնարհության մասին

Հայր Մակարիոս Եգիպտացու մասին ասում էին, թե մի անգամ Սկյութիայից ելնում էր դեպի Նիտրեա լեռը: Երբ մոտեցավ տեղին, աշակերտին ասաց. «Առա՛ջ անցիր մի փոքր»: Եվ երբ աշակերտն առաջ անցավ, պատահեց մի հեթանոս քրմի, որը՝ ձեռքին մի մեծ ձեռնափայտ, գնում էր ճանապարհով: Տեսնելով նրան` աշակերտը ձայն տվեց նրան և ասաց. «Ո՞ւր ես գնում, ա՜յ դև»: Իսկ նա, ետ դառնալով, չարաչար գանահարեց նրան և կիսամեռ թողնելով` վերցրեց ձեռնափայտն ու շարունակեց ճանապարհը: Քիչ անց, առաջ ընթանալով` պատահեց նրան հայր Մակարիոսը և ասաց. «Ապրի՛ր, տառապյալդ»: Իսկ նա սքանչացած եկավ դեպի հայր Մակարիոսն ու ասաց. «Ի՞նչ բարի բան տեսար իմ մեջ, որ ողջունեցիր ինձ»: Ասաց ծերը նրան. «Որովհետև տեսա քեզ հոգնաբեկ, սակայն չգիտես, որ իզուր ես ջանում»: Քուրմն ասաց. «Իսկ ես, քո ողջույնը լսելով, զղջացի և հասկացա, որ դու Աստծո մարդն ես, սակայն մի ուրիշ չար մենակյաց հանդիպեց և դառնացրեց ինձ, և ես մահու չափ գանահարեցի նրան»: Եվ ծերն իմացավ, որ դա իր աշակերտն է: Իսկ քուրմը նրա ոտքերը բռնելով` ասաց. «Քեզ բաց չեմ թողնի, մինչև ինձ մենակյաց չդարձնես»: Եվ գալով այն տեղը, ուր եղբայրն էր ընկած, վերցնելով նրան` բերին լեռան եկեղեցին, և եղբայրները, տեսնելով քուրմին նրանց հետ, նրան ևս մենակյաց դարձրին»:

 

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016

19.02.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․