Գրքեր

Նշխար, գինի, մաս

Նշխարը Սուրբ Հաղորդության կամ Պատարագի համար հատուկ պատրաստված շրջանաձև հաց է՝ վրան պատկերված Քրիստոսի խաչելության կամ հարության նկար: Այն տափակ, բոլորակ, բաղարջ հաց է, որը եփում են սաճի վրա, Պատարագին սրբագործում և որպես Փրկչի Մարմին հաղորդում հավատացյալներին: Նշխարի չափը կախում ունի սկիհի մեծությունից: Քանի որ Պատարագին օգտագործվում է մեկ հատ նշխար, նկատի ունենալով հաղորդվողների քանակը պատրաստում են մեծ չափի նշխար: Պատարագի նշխարը, ըստ առաքելական կանոնի, պատրաստվում է Պատարագ մատուցելու առավոտյան: Իսկ այն նշխարները, որ տրվում են ժողովրդին (տնօրհնեք, ննջեցյալ և այլն) կարող են պատրաստվել որևէ մի օր:

Գինին Սուրբ Հաղորդության նյութն է: Այն խաղողից պատրաստված անապակ, այսինքն՝ մաքուր խմիչք է, որը գործածվում է Սուրբ Պատարագին՝ ի նշան Քրիստոսի արյան:

Հնում Սուրբ Պատարագի գինին պատրաստվում էր հոգևորականների ձեռքով այգիներից հավաքված և բարեպաշտ ժողովրդի կողմից նվիրված ընտիր խաղողից: Ջահընկալի պարտականությունն էր գինին պահելը և Սուրբ Պատարագին մատուցելը:

Այն բոլոր իրերը, ինչպես՝ խաչ, պատկեր, ավազան, Սուրբ Սեղան և այլն, որոնք եկեղեցում պետք է օծվեն, նախ լվանում են ջրով, ապա ծիսական կարգադրությամբ նաև՝ գինով, որից հետո էլ տեղի է ունենում օծումը:

Հնում Պատարագի նշխարներն այնքան շատ էին պատրաստում, որ դրանց մի մասը սրբագործության համար ընտրելուց հետո, մնացածը արարողության վերջում բաժանում էին չհաղորդվածներին՝ իբրև սուրբ խորհրդի մասնակցության նշան: Այս նշխարները կոչում էին մաս:

Այժմ մասը լիովին տարբերվում է Հաղորդության նշխարից: Այն շատ բարակ և բոլորաձև պատրաստված բաղարջ հաց է, առանց պատկերի, որ օրհնվում է Սբ. Պատարագի ժամանակ և Պատարագի վերջում փոքր կտորներով, մասերի բաժանելով՝ բաշխում են ժողովրդին: Մասը մինչև Պատարագի վերջը պահվում է Սեղանի ետևը: Ուտում են նրանք, որոնք տվյալ օրը Սուրբ Հաղորդություն չեն ընդունել և այդպիսով նրանք էլ հաղորդակից են դառնում սուրբ խորհրդին:

09.11.14
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․