1 Ապրիլ, ԴՇ, Մեծ Պահքի ԼԸ օր

Գրքեր

«Ոսկե օրենքը» քրիստոնյայի կյանքից ներս

«Այն ամենը, ինչ կկամենաք, որ մարդիկ ձեզ անեն, այդպես և դո՛ւք արեք նրանց, որովհետև ա՛յդ իսկ են Օրենքն ու մարգարեները» (Մատթ. 7:12), այս պարզ խոսքերով Քրիստոս ողջ մարդկության համար հաստատեց «Ոսկե օրենքը»: Մինչ Քրիստոս մի շարք մտածողներ արտահայտել են նման միտք, բայց ի տարբերություն Տիրոջ խոսքի՝ նրանք ժխտողականություն են արտահայտել: Օրինակ՝ հրեա փիլիսոփա և պատմաբան Փիլոն Ալեքսանդրացին ասել է՝ այն, ինչ չես սիրում, մի արա ուրիշին: Չինացի ուսուցիչ, քաղաքական գործիչ և փիլիսոփա Կոնֆուցիոսին երբ հարցրին, թե կա այնպիսի մի խոսք, որ կարող է յուրաքանչյուր մարդու համար օրենք համարվել, նա պատասխանեց. «Փոխադարձ վերաբերմունքը. ինչ չես ցանկանում քեզ համար, այն մի արա ուրիշին»: Եկեղեցու հայրերից Ս. Հովհան Ոսկեբերանը, «Ոսկե օրենքը» մեկնելով, ասել է, որ Տերը հորդորում է առաքինի կյանքով ապրել. «Նա չասաց՝ ինչ ցանկանում ես Աստծուց քեզ համար, այն արա քո մերձավորին, որպեսզի դու չընդդիմանաս և չասես, թե ինչպես է դա հնարավոր, Նա Աստված է, իսկ ես՝ մարդ: Քրիստոս ասաց՝ ինչ ցանկանում ես քեզ համար քեզ հավասար որևէ մեկից, նույնը դու արա նրան: Տերը արտասովոր բան չպահանջեց, այլ այն, ինչ պահանջում է բնությունը. ցանկանո՞ւմ ես, որ հարգեն քեզ, դու ինքդ հարգիր, ցանկանո՞ւմ ես սիրելի լինել, ինքդ սիրիր»:

«Ոսկե օրենք»-ի գործածության արդյունքում են կյանքի կոչվում եկեղեցական համայնքային կյանքից ներս իրականացվող սոցիալական ծրագրերը: Փետրվարի 12-ին, Զորավոր Ս. Աստվածածին եկեղեցու և «Արև-երեխաներ» ՀԿ-ի սոցիալական ծրագրերի շրջանակում, հոգևոր հովիվ Տեր Գրիգոր քահանա Գրիգորյանը Պետրոսյան Նաիրային (47տ.) հանձնեց դրամական օգնություն (50 000 դրամ), որ տրամադրել էր եկեղեցու համայնքի անդամներից մեկը, որը չցանակացավ իր անունը նշել: Նաիրան Դաունի համախտանիշ ունեցող իր տասնմեկամյա որդու՝ Արմանի հետ բնակվում է Րաֆֆու 111/24ա հանրակացարանում: «Տղաս, թույլ դիմադրողականություն ունենալու պատճառով, հաճախակի է հիվանդանում թոքաբորբով: Այժմ նրա բուժման համար պահանջվող դեղորայքի մի մասն եմ կարողացել գնել, քանի որ Արմանի խնամքով զբաղված լինելով՝ չեմ կարողանում աշխատել, իսկ ընտանեկան նպաստի և տղայիս հաշմանդամության թոշակի գումարները բավարարում են միայն, որ մասամբ հոգամ մեր նվազագույն կարիքները»,- ասաց Նաիրան: Արմանը սովորում է Նուբարաշենի թիվ 11 հատուկ դպրոցում: Նա մեծ ուրախությամբ և ոգևորությամբ է հաճախում «Արև-երեխաներ» ՀԿ-ի Արևի թատրոն: Նաիրան շնորհակալություն հայտնեց «Արև-երեխաներ» ՀԿ-ին և աջակից անձին՝ ցուցաբերած օգնության համար:

 

Կարինե Սուգիկյան

12.02.20
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․