Գրքեր

Օտարասեր և ողորմած լինելու մասին

Հայր Սրապիոնի մասին պատմում էին, թե հանդիպեց Ալեքսանդրիայում նրան մի մերկ մարդ, որ սաստիկ մրսած էր, և նա խորհեց և ասաց. «Ինչո՞ւ ես, որ ճգնավոր եմ համարվում, հագնված եմ, իսկ այս աղքատը, որ նույն ինքը Քրիստոս է, այսպես մերկ և սառած շրջում է, և ես մարդասպան կկոչվեմ, եթե սա մեռնի»: Եվ նույն պահին մերկանալով` իր հանդերձները տվեց աղքատին և ինքը մերկ նստեց` Ավետարանը դնելով թևատակին: Եվ ծանոթներից մեկը նրան տեսնելով` ասաց. «Հա՛յր Սրապիոն, ո՞վ մերկացրեց քեզ»: Եվ նա, ցույց տալով Ավետարանը, ասաց. «Սա՛ մերկացրեց ինձ»: Եվ այնտեղից վեր կենալով` տեսավ մեկ ուրիշին, որին քարշ էին տալիս, քաշքշում էին և պարտքն էին պահանջում, իսկ նա չուներ, որ պարտքերը հատուցեր: Այնժամ գթալով նրան` տվեց Ավետարանը, որ պարտքերը հատուցի, և ինքը մերկ գնաց իր խուցը: Երբ աշակերտը տեսավ նրան այդպես, հարցրեց. «Որտե՞ղ է, հա՛յր, քո պարեգոտը»: Ծերն ասաց. «Ուղարկեցի այնտեղ, ուր առավել անհրաժեշտ էր»: Եղբայրն ասաց. «Որտե՞ղ է այն փոքրիկ Ավետարանը»: Ծերն ասաց. «Թո՛ղ ինձ, որդյա՛կ, Այն, որ միշտ ասում էր ինձ, թե` վաճառեցեք ձեր ունեցվածքը և տվեք աղքատներին (Մատթ. ԺԹ 21, Մարկ. Ժ 21, Ղուկ. ԺԸ 22 ), հենց Իրեն վաճառեցի և տվեցի նրանց, որպեսզի դատաստանի օրը առավել համարձակություն ունենամ»:

 

«Սուրբ հայրերի վարքն ու կենցաղավարությունը» գրքից, Հատոր Ա, Էջմիածին 2016

07.12.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․