10 Օգոստոս, Բշ, Աստվածածնի պահքի Ա օր

Գրքեր

«Պատանի Հիսուսի քարոզը տաճարում» թեմայի պատկերագրական լուծումները

«Պատանի Քրիստոսը ուսուցանում է տաճարում» (Ղուկաս 2:41-52) թեման հազվադեպ է պատկերազարդվում և քիչ հանդիպող թեմաների շարքին է պատկանում:

№ 6319 ձեռագրում «Պատանի Հիսուսի քարոզը տաճարում» միավորված է Զեբեդեոսի որդիների մոր դրվագի հետ. սա եզակի դեպք է հայ միջնադարյան մանրանկարչության մեջ: Թեև նկարիչը ձգտել է պատկերին հաղորդել պաշտամունքային միտվածություն, բայց դրա կառուցվածքը բխում է ավետարանական բնագրից: Վերևում լայն կամարի տակ կանգնած է պատանի Հիսուսը: Ձախում ձեռքերն առաջ պարզած և հուզված Հովսեփն է, աջ կողմում՝ Հակոբոսն ու Հովհաննեսը: Ներքևի մասում գտնվող կնոջ մոտ նկարիչը մակագրել է՝ «Մայր որդոցն Զեբեթայ»:

Արցախում հատկապես ուշադրություն են դարձնում Հիսուսի մանկության և պատանեկության իրադարձություններին. հաճախ են պատկերվում «Մանկանց կոտորումը», «Փախուստ դեպի Եգիպտոս», «Տեառնընդառաջ», «Պատանի Հիսուսի քարոզը տաճարում»: Մեծ հետաքրքրություն են ներկայացնում որոշ թեմաների պատկերագրական յուրահատուկ լուծումները: Այստեղ ևս «Հիսուսի քարոզը տաճարում» թեման տրված է Զեբեդեոսի այրու որդիների մասին թեմայի հետ զուգահեռ:

Ոսկանյան Աստվածաշնչի «Մանուկ Հիսուսը տաճարում՝ վարդապետների մեջ» փորագրանկարում տասներկուամյա Հիսուսը պատկերված է տաճարում՝ բազմած գահին, գեղեցիկ դիմագծերով, լուսապսակով, ձեռքում պահում է բացված գիրքը: Հիսուսի երկու կողմերում՝ ցածր աթոռներին նստած են հրեա ուսուցիչները, զարմացած ու կլանված լսում են արտասովոր խոսքը: Բոլորը հիանում են Նրա պատասխաններով և խոհեմությամբ:

 

Կազմեց Գայանե Սուգիկյանը

02.08.19
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․