«Պատմվե՞ց քեզ, ո՛վ մարդ, թե ի՛նչ է բարին և ի՞նչ է ուզում քեզնից Տերը»

Նոյեմբերի 29-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Ոսկանյան Սիրանուշին (30 տ.) հանձնեց դրամական օգնություն (100 ԱՄՆ դոլար), որ տրամադրել էր ամերիկաբնակ Կարեն Վարդանյանի ընտանիքը: Ինը հոգուց բաղկացած Ոսկանյան ընտանիքը բնակվում է Էջմիածին քաղաքի Մաշտոց փողոցի 13 հասցեում գտնվող երկու սենյականոց խոնավ բնակարանում, որ զուրկ է կեցության համար տարրական պայմաններից: Սիրանուշը նշեց, որ ձմռանը խոնավության պատճառով իրենք չեն կարողանում բնակարանը տաքացնել, բացի այդ չեն կարողանում լուծել նաև մահճակալների հարցը. ինը հոգուց բաղկացած ընտանիքն ընդամենը  երեք մահճակալ ունի: Սիրանուշն օգնության խնդրանքով դիմել է քաղաքապետարան, բայց մնացել է անպատասխան: Սիրանուշի ամուսինը՝  Ոսկանյան Ալեքսանը (49 տ.),  երկրորդ խմբի հաշմանդամ է և ի վիճակի չէ աշխատելու:  

«Չորս տղա և երեք աղջիկ ունեմ, եկող տարի՝ ապրիլ ամսին, կծնվի մեր ութերորդ բալիկը: Ֆինանսական խնդիրների պատճառով երեխաներիցս չորսը հաճախում են Էջմիածնի թիվ 2 գիշերօթիկ դպրոց: Ընտանեկան նպաստի և ամուսնուս հատկացվող թոշակի գումարներով փորձում ենք մասամբ հոգալ մեր նվազագույն կարիքները, նաև օգտվում ենք Մայր Աթոռ Սուրբ Էջմիածնի «Հրաչ և Սյուզան Թուֆայան» հայորդյաց տան բարեգործական ճաշարանից»,- ասաց բազմազավակ ընտանիքի մայրը: Նա անչափ շնորհակալ էր Տեր Գրիգորին և աջակից ընտանիքին՝ ուշադրության և աջակցության համար:

«Պատմվե՞ց քեզ, ո՛վ մարդ, թե ի՛նչ է բարին և ի՞նչ է ուզում քեզնից Տերը. իրավունք հաստատել, ողորմություն սիրել և պատրաստ լինել քո Տեր Աստծո հետևից գնալու» (Միքիա 6:8): Ս. Կյուրեղ Ալեքսանդրացին, սույն հատվածը մեկնելով, նշում է, որ Աստված ցանկանում է իրավունք հաստատես, այսինքն՝ արդարություն գործես, սիրես ողորմությունը, այսինքն՝ հարստանաս եղբայրասիրությամբ, պատրաստ լինես Տիրոջ հետևից գնալու, այսինքն՝ Նրա հանդեպ խոնարհություն և հնազանդություն ունենաս: «Որպես Աստծո կողմից ընտրված, սրբված և Նրա սերը վայելող մարդիկ, եղե՛ք գթասիրտ, ողորմած, քաղցր, խոնարհ, հեզ և համբերատար»,- հորդորում է Պողոս առաքյալը կողոսացիներին (Կողոս. 3:12): Եվ Ինքը՝ Տերն էլ ասաց. «Գթասի՛րտ եղեք, ինչպես որ Ձեր Երկնավոր Հայրն էլ գթասիրտ է» (Ղուկաս 6:36):

«Դու հարցնում ես, թե ի՞նչ կարող եմ տալ Աստծուն,- այս հարցադրմանը երանելի Օգոստինոսը պատասխանում է և ասում,- ինքդ քեզ: Ի՞նչ է պահանջում Աստված քեզանից, եթե ոչ ինքդ քեզ»: 

Կարինե Սուգիկյան