Գրքեր

«Քանզի Տերը ում սիրում՝ նրան խրատում է…»*

- Հա՛յր, մարդիկ այսօր ինչո՞ւ են այսքան տառապում:

- Աստծո սիրուց: Դու, միանձնուհի լինելով, առավոտյան վաղ ես արթնանում, քո վանական կարգն ես կատարում, համրիչով աղոթում ես, ծնրադրում և այլն: Այն դժվարությունները, որոնց միջով աշխարհիկ մարդիկ են անցնում՝ իրենց կարգն է, իրենց կանոնը: Մարդիկ մաքրվում են այդ դժվարությունների ու տառապանքի միջոցով: Այդ տառապանքը նրանց ավելի մեծ օգուտ է տալիս, քան աշխարհիկ անհոգ կյանքը, որը նրանց ո՛չ օգնում է Աստծուն մոտենալ, ո՛չ էլ՝ երկնային հաշվի վրա հոգևոր խնայողություններ հավաքել: Այդ պատճառով էլ մարդիկ վշտերն ու փորձությունները պետք է որպես Աստծո պարգևներ ընդունեն:

Բարեգութ Աստված, Բարի Հոր պես, կամենալով, որպեսզի Իր զավակները դեպի Իրեն դառնան՝ փորձությունների միջոցով է դաստիարակում նրանց: Նա՝ դա սիրուց մղված և աստվածային բարությունից է անում, այլ ոչ թե՝ չարությունից կամ աշխարհիկ օրենքների վրա հիմնված արդարությունից ելնելով: Այսինքն, կամենալով փրկել Իր արարածներին, կամենալով, որպեսզի նրանք Իր Երկնային Արքայությունը ժառանգեն՝ Աստված փորձություններ է թույլ տալիս: Նա թույլ է տալիս փորձություններ պատահեն, որպեսզի մարդը պայքարի, սխրանք գործի և քննություն հանձնի՝ ցավի մեջ համբերելու համար, այնպես, որպեսզի սատանան չկարողանա ասել. «Ինչի՞ համար ես վարձատրում նրան կամ ինչպե՞ս ես փրկում նրան: Չէ՞ որ նա ջանք չի թափել»: Երկրային կյանքն Աստծուն չի հետաքրքրում, Նրան ապագա կյանքն է հետաքրքրում: Նախ և առաջ, Նա հոգ է տանում մեր ապագա կյանքի մասին և հետո միայն՝ երկրայինի:

- Հա՛յր, Աստված ինչո՞ւ է որոշ մարդկանց շատ փորձություններ ուղարկում, իսկ մյուսներին ընդհանրապես չի ուղարկում:

- Սուրբ Գիրքն ի՞նչ է ասում: «Քանզի Տերը ում սիրում՝ նրան խրատում է…» (Առակ. 3:12): Օրինակ՝ մեկը ութ երեխա ունի: Հինգը հոր հետ են ապրում, իսկ երեքը հեռանում են տնից ու մոռանում հորը: Եթե հոր հետ ապրող երեխաներն ինչ-որ սխալ գործեն, ապա հայրը կարող է նրանց ականջները ձգել, կամ ծոծրակին հասցնել, կամ էլ փաղաքշել նրանց և շոկոլադ տալ, եթե ողջամիտ են: Իսկ նրանք, որոնք հորից հեռու են ապրում՝ ո՛չ քնքշանք ունեն, ո՛չ էլ՝ ծոծրակին հարված: Այդպես էլ Աստված է վարվում: Իր հետ ապրող կամ դեպի բարին շարժվող մարդկանց «ծոծրակին հասցված հարվածով» է Աստված պատժում, եթե մեղք են գործում և այդ կերպ վճարում են իրենց մեղքերի համար: Կամ էլ, եթե նրանց շատ հարվածներ է տալիս, ապա իրենց համար երկնային վարձք են կուտակում: Իսկ նրանց, ովքեր իրենից հեռու են ապրում՝ երկար տարիների կյանք է տալիս, որպեսզի դարձի գան: Այդ պատճառով էլ տեսնում ենք, որ աշխարհիկ մարդիկ լուրջ մեղքեր են գործում և չնայած դրան՝ ապահովված են նյութական բարիքներով և առանց վշտերի ապրում են երկար տարիներ: Դա Աստծո նախախնամությամբ է կատարվում, որպեսզի այդ մարդիկ ապաշխարեն: Եթե չապաշխարեն, ապա մյուս կյանքում արդարանալու բան չեն ունենա:

 

* Առակ. 3:12

 

Պաիսիոս Աթոսացու «Ընտանեկան կյանք» գրքից

Ռուսերենից թարգմանությունը՝ Էմիլիա Ապիցարյանի

05.07.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․