«Սերը ճշմարիտ ծառայության անհրաժեշտ հիմքն է»

Հոկտեմբերի 3-ին, Զորավոր Ս. Աստվածածին եկեղեցում, հոգևոր հովիվ Տեր Գրիգոր քահանա Գրիգորյանը Սահակյան Քրիստինեին (27 տ.) հանձնեց դրամական օգնություն (100 ԱՄՆ դոլար), որ տրամադրել էր եկեղեցու սոցծրագրերի մշտական աջակից ամերիկաբնակ Վարդանյան ընտանիքը: Քրիստինեն իր երկու տղաների՝ Աբրահամի (7 տ.) և Գոռի (4 տ.) հետ վարձակալությամբ բնակվում է Բյուրեղավան քաղաքի 25 շ. 10 բն. հասցեում: Ընտանիքը մի շարք խնդիրների առջև է կանգնած. երկու տարի է, ինչ Քրիստինեն միայնակ է խնամում իր տղաներին: «Մեծ տղաս հաշմանդամություն ունի, երեք ամսականից տառապում է բրոնխիալ ասթմա հիվանդությամբ: Ժամանակ առ ժամանակ անվճար բուժումներ է անցնում, բայց բուժման համար անհրաժեշտ դեղորայքը ես եմ գնում: Իմ աշխատավարձը, երեխայիս հաշմանդամության և ընտանեկանի նպաստի գումարները բավարարում է միայն, որ հոգանք մեր նվազագույն կարիքները»,- ասաց Քրիստինեն և իր երախտագիտությունը հայտնեց աջակից Վարդանյան ընտանիքին:

Ճշմարիտ ծառայությունը Տերը յուրովի էր ընկալում. Նա Իր կյանքով էր վկայում այդ ծառայության մասին, Նա այնտեղ էր, որտեղ սիրո և աջակցության կարիք կար: Ըստ Շենուդա Գ հայրապետի՝ սերը քրիստոնեության մեջ առաջին պատվիրանն է, ծառայության անհրաժեշտ հիմքը: Հայրապետը ճշմարիտ ծառայության վերաբերյալ ասել է. «Երբ մի անգամ Տերը ժամեր շարունակ բազմության հետ խոսում էր շնորհի մասին, օրն սկսեց մթնել, և աշակերտները մոտեցան Նրան ու ասացին. «Արձակիր այս ժողովրդին, որպեսզի գնան շրջակա գյուղերն ու ագարակները, հանգստանան և կերակուր գտնեն» (Ղուկ. 9:12, Մատթ. 14:15): Աշակերտների միտքը դեռ հասուն չէր: Ծառայությունը նրանց համար զուտ մարդկանց ասված խոսք էր, ոչ թե՝ գործերով ի հայտ եկող սեր: Տերը պատասխանեց. «Հարկ չկա, որ նրանք գնան, դուք նրանց ուտելու բան տվեք»»:

Կարինե Սուգիկյան