Գրքեր

Շապիկ

Եկեղեցում շապիկ կրում են բոլոր աստիճանավորները: Այն նվիրապետական բոլոր աստիճաններում էլ մնում է իբրև առաջին զգեստը, որի վրայից կրում են նվիրապետական հաջորդ աստիճանները խորհրդանշող հանդերձանքը:

Շապիկը Ահարոնի պատմուճանի օրինակն ունի: Այն երկար ու ճերմակ զգեստ է, ծածկում է ողջ մարմինը՝ ուսից մինչև գարշապար: Նրա վերին մասը զարդարվում է առանձին կտորով՝ ուսանոցով, որն ամուր կարվում է շապիկին: Այն շապիկի վերին մասում ծածկում է թիկունքը և ուսերը, իսկ առջևից՝ կուրծքը:

Խաչանիշ ուսանոցով շապիկներ հագնում են դպիրներն ու սարկավագները, իսկ պատարագիչ հոգևորականները՝ առանց ուսանոցի: Պատարագիչ քահանայի շապիկն ամբողջովին միայն սպիտակ է լինում, իբրև խորհրդանիշ սրբության և անապականության, այն լուսեղեն պատմուճանի, որ կրում էր Ադամը դրախտում: Շապիկը խորհրդանշում է եկեղեցական աստիճանավորների դասակցումը երկնային նվիրապետության աստիճանավորներին, այսինքն՝ հրեշտակներին: Քահանայական սպիտակ շապիկը միաժամանակ թելադրանք է եկեղեցում հավատացյալներին ձգտելու այդ փրկության պատմուճանով զգեստավորվելու: Այն նաև խորհրդանշում է մեր Տեր Հիսուս Քրիստոսի անկար պատմուճանը, որը Քրիստոսի խաչելության ժամանակ չպատռվեց հռոմեացի զինվորների կողմից, այլ վիճակ գցեցին և ամբողջական պատմուճանը վերցրեց նա, ում վիճակը ելավ:

Սուրբ Պատարագի զգեստավորման արարողության ժամանակ շապիկը հագնելիս քահանան ասում է. «Տե՛ր, հագցրու ինձ փրկության հանդերձը և ուրախության պատմուճանը և շրջապատիր փրկության զգեստով», որը խորհրդանշում է Աստծուն շրջապատած շնորհները, որոնք պատարագչին պիտի պահպանեն չար խորհուրդներից և դիվական փորձություններից:

12.03.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․