Գրքեր

Սիրո տոնը շարունակվում է

Փետրվարի 3-ին Արարատյան Հայրապետական թեմի առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի հանդիսապետությամբ Փ. Թերլեմեզյանի անվան գեղարվեստի պետական քոլեջում բացվեց Ս. Սարգսի տոնին նվիրված առաջին ցուցահանդես-մրցույթը: Ներկա էր ՀՀ առաջին տիկին Ռիտա Սարգսյանը:

Ողջունելով հյուրերին` քոլեջի տնօրեն Աննա Մնացականյանը շնորհակալություն հայտնեց Արարատյան Հայրապետական թեմին, որ Ս. Սարգսի տոնի առթիվ հնարավորություն են ունեցել միանալու ուսանողական ցուցահանդեսին ու ներկայացնել իրենց սաների աշխատանքները:

Իր օրհնության խոսքի մեջ Նավասարդ Սրբազանը ի մասնավորի ասաց. «Ներկայացված աշխատանքները պետք է խորահայաց լռության մեջ տեսնել: Այս անբարբառ պատկերներում դաջված են նկարիչների հոգիները, նույնիսկ այն արտանկարների մեջ, որոնք Մատենադարանի ձեռագրերից են վերցված: Այս միջոցառումը ներառված է Ս. Սարգսի տոնի շրջագծի մեջ, և բնական է, որ ներկայացված գործերում կտեսնեք նաև Ս. Սարգսի և եկեղեցական այլ խորհրդանիշեր պարունակող նկարներ: Այստեղ ներկա ուստրերին ու դուստրերին մաղթում ենք, որ լինեն աղոթական, և արագահաս Ս. Սարգսի բարեխոսությամբ իրենց իղձերն իրականանան: Թող հայոց երկնակամարում նրանցով մի լուսավոր ծիլ բացվի, որպեսզի զորացած ոգով կարողանան կերտել մեր երազած երկիր Հայաստանը: Շնորհավորում ենք բոլորիդ`մաղթելով անսպառ եռանդ ու հավատ, որպեսզի ձեր ստեղծագործական միտքը հասնի նորանոր բարձունքների»:

Ցուցահանդեսի բոլոր 60 մասնակիցները Նավասարդ Սրբազանի կողմից պարգևատրվեցին շնորհակալագրերով: Ս. Սարգսի տոնի խորհուրդը լավագույնս ներկայացնող աշխատանքներն Արարատյան Հայրապետական թեմի կողմից դրամական մրցանակների կարժանանան:

Ս. Սարգսի տոնակատարությունների շրջանակում արդեն երկրորդ տարին կազմակերպվում են ստեղծագործական բուհերի ուսանողների աշխատանքների ցուցահանդես-մրցույթներ:

Սա այս տարվա առաջին ցուցահանդեսն էր: Փ. Թերլեմեզյանի անվան գեղարվեստի պետական քոլեջն առաջին անգամ է միացել տոնին: Բոլոր մասնակիցներն իրենց աշխատանքները ներկայացնելու հնարավորություն կունենան փետրվարի 7-ին Ազատության հրապարակում տեղի ունենալիք Բուն Բարեկենդանի տոնախմբության ժամանակ:

Առաջիկայում կբացվի ևս երեք ցուցահանդես` նվիրված Ս. Սարգսի տոնին:
 

Արարատյան Հայրապետական թեմի տեղեկատվական բաժին

03.02.16
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․