Ստի հետ ճշմարտություն չես գտնի

Մի մարդ լսեց, որ աշխարհում ճշմարտություն կա ու գնաց այն որոնելու: Ճանապարհին նրան հանդիպեց սուտը:

- Ո՞ւր ես գնում,- հարցրեց սուտը:

- Գնում եմ ճշմարտություն որոնելու:

- Ի՜նչ լավ է,- ասաց սուտը,- ես էլ եմ ուզում այն տեսնել, որովհետև երբևէ չեմ հանդիպել: Միասին գնանք:

Հասան մի քաղաք ու հարցրեցին.

- Այստեղ ճշմարտություն կա՞:

- Կար, բայց քիչ առաջ հեռացավ:

Մարդն ու սուտը շարունակեցին իրենց ճանապարհն ու մի ուրիշ քաղաք հասան: Կրկին հարցրեցին.

- Ճշմարտությունն այստեղ եղե՞լ է:

- Եղել է, բայց այս պահին այստեղ չէ- պատասխանեցին,- երևի մոտակայքում կլինի: Իսկ այդ ո՞վ է քեզ հետ:

- Սուտն է,- պատասխանեց մարդը:

- Իսկ ո՞վ կարող է ստի հետ ճշմարտությունը գտնել,- զարմացան մարդիկ,- վռնդիր նրան:

- Իսկապես որ,- համաձայնվեց մարդը,- ինչպես շուտ չէի հասկացել:

Վռնդեց իրենից սուտն ու տեսավ, թե ինչպես է ճշմարտությունն իրեն ընդառաջ գալիս:

Ռուսերենից թարգմանությունը՝ Էմիլիա Ապիցարյանի