5 Հունիս, Ուր, Զ օր Հոգեգալստյան, Պահք

Գրքեր

Սուրբ Մկրտություն

- Հա´յր, իսկ ի՞նչ է լինելու Հյուսիսային Էպիրի* այն բնակիչների հետ, որոնք չմկրտված են մահանում:

- Դե, նրանցից շատերն իրենց ծնողների կողմից մկրտվել են օդային Մկրտությամբ**: Իսկ շատերն այդ երկրներում օդային Մկրտություն են ստացել դայակներից կամ բուժքույրերից՝ ծննդատանը: Ես մի դեպք գիտեմ, երբ մի բուժքույր նորածնին մկրտել է ջրով լի թասի մեջ: Աստված տեսնում էր այդ կնոջ մղումը… Իսկ որքա՜ն Շնորհներ են ունենում նոր մկրտվածները: Մի անգամ, երեք հարյուր հիսուն հոգանոց խմբում, ես տարբերեցի մկրտված կնոջը: Ես հարցրեցի, թե ով է նա և ինձ ասացին, որ դա մի թրքուհի է, որ Սուրբ Մկրտություն է ստացել: Նրա դեմքը շողում էր: Նրա կողքին մյուսները բարբարոս էին թվում:

- Հա՛յր, իսկ արդյոք ճի՞շտ է, եթե Մկրտության ժամանակ երեխաներին երկու անուն են տալիս:

- Եթե ամուսինները վիճում ու ամուսնալուծվում են այն պատճառով, թե ինչ անուն տան երեխային, ապա թող թեկուզ երեք անուն տան: Բայց ախր ճիշտ քրիստոնեական անուններն այժմ Աստված գիտե, թե ինչի են վերածել… Վիկի, Պեպպի, Միմի…

- Հա՛յր, մի կին կորցրեց երեխային հղիության հինգերորդ ամսում: Նա մահացած ծնվեց, և այժմ այդ կինը վշտանում է, որ հնարավոր չեղավ երեխային նույնիսկ օդային Մկրտություն տալ:

- Եթե նա ինքը մեղավոր չէ դրանում, ապա թող Աստծուն վստահի: Աստված գիտի ինչ անել այդպիսի երեխաների հետ և որտեղ նրանց տեղավորել:

- Հա՛յր, մայրս պատմել է ինձ, որ եղբայրներիցս մեկը մահացել է ծնվելուց մի քանի ժամ անց և նա չի հասցրել մկրտել նրան: Ես խորհուրդ տվեցի նրան խոստովանահորը պատմել դրա մասին:

- Քանի որ նա ուզում էր, սակայն չհասցրեց մկրտել, ապա մեղմացուցիչ հանգամանքներ ունի: Այլ կանայք ընդհանրապես աբորտ են անում ու իրենք են սպանում սեփական երեխաներին: Աստծո դատաստանն անքննելի է մեզ համար: Ծանր մեղք կլիներ, եթե նա չհասցներ երեխային մկրտել անփութության պատճառով և նա չմկրտված մահանար: Դու նման բաների մասին ողջամտության տեսակետից ես դատում: Դա ռացիոնալիզմի աստվածաբանությունն է: Հիշում եմ, մի անգամ ինձ մոտ ուխտավորների մի խումբ եկավ և ես նրանց հետևյալ դեպքը պատմեցի: Հյուսիսային Էպիրից մի փոքրիկի երեք անգամ էին մկրտել: Մի անգամ տատիկը, մյուս անգամ պապիկը, այնուհետև՝ մայրը, մեկը մյուսից թաքուն, որովհետև նրանք բոլորն էլ նորածնին չմկրտված էին համարում: Երբ ես պատմում էի այդ պատմությունը, ուխտավորներից մեկը մոտ ցատկեց ու հայտարարեց. «Դա կանոնական չէ»: «Լսի՛ր,- ասացի նրան,- քո կարծիքով նրանք կարդացել էին ինչ-որ դավանաբանական գրքում, որ երեխային պետք է երեք անգա՞մ մկրտել: Ախր այդ երեխան եռակի օրհնություն է ստացել»:

- Հա՛յր, երբեմն մարդիկ իրենց երազներում մահացած հարազատներին են տեսնում ու խոսում են նրանց հետ: Դա թույլատրվում է Աստծո կողմից այն բանի համար, որպեսզի հավատի ու ապաշխարության մեջ օգնի՞ մարդկանց:

- Այո՛: Մի՞թե ես ձեզ նման դեպք չեմ պատմել: Սուրբ Լեռան վանականներից մեկը ծագումով մի գյուղից էր, որ Բուլղարիայի տարածքում էր գտնվում: Այնտեղ շատ չմկրտվածներ կային: Այդ վանականը պատմեց ինձ, որ դեռևս աշխարհիկ և չմկրտված լինելով՝ երազում իր փոքրիկ զարմիկին էր տեսել, որ վերջերս էր մահացել: Փոքրիկը կանգնել էր մի հրաշալի այգու ցանկապատի ետևն ու լաց էր լինում: Իսկ այգում բազում երեխաներ կային, որ ուրախանում ու խաղում էին: «Ինչո՞ւ այգի չես գնում»,- հարցրեց այդ երազը տեսնող մարդը: «Ինչպե՞ս կարող եմ այնտեղ գնալ,- պատասխանեց երեխան,- Ախր ես մկրտված չեմ»: Այս դեպքից հետո այդ մարդն անմիջապես գնաց ու մկրտվեց, իսկ այնուհետև պատմեց քահանային, թե ինչ էր տեսել երազում: Աստված այդպես դասավորեց, որպեսզի մյուսները նույնպես հասկանան, թե Սուրբ Մկրտությունն ինչպիսի արժեք ունի: Բուլղարական այդ գյուղի բնակիչները նույնպես սկսեցին մկրտել երեխաներին այդ դեպքից հետո:

- Հա՛յր, քաղաքացիական ամուսնությամբ ապրող որոշ ծնողներ ցանկանում են մկրտել իրենց երեխաներին: Կարելի՞ է արդյոք դա անել:

- Իսկ ինչո՞ւ չի կարելի: Ի՞նչ մեղք ունեն խեղճ երեխաները: Այն փաստը, որ քաղաքացիական ամուսնություն ունեցող մարդիկ ուզում են մկրտել իրենց երեխաներին, վկայում է այն մասին, որ նրանց ներսում ինչ-որ (բարի) բան կա, որ այդ մարդիկ լիովին անտարբեր չեն: Հավանաբար այդ մարդիկ ինչ-որ տեղ և ինչ-որ բանում խճճվել են: Եթե ինչ-որ մեկն ուզում է օգնել նրանց, ապա նախ պետք է պարզել, թե ինչու նրանք եկեղեցում չեն պսակադրվել, այնուհետև՝ ինչու են ուզում մկրտել իրենց երեխաներին:

- Հա՛յր, եթե մենաստան գնալուց առաջ միանձնուհին Մկրտությամբ ինչ-որ մեկի կնքամայրն է եղել, ապա այժմ, աղոթքներից զատ, պարտավո՞ր է իր սանիկին նվերներ ուղարկել, ինչպես դա աշխարհիկ կնքահայրերն ու կնքամայրերն են անում:

- Դե, միանձնուհին այժմ ազատված է այդպիսի պարտականություններից: Վանականը (իր սանիկին) աղոթքով է օգնում: Իսկ ահա նրա ծնողները, եթե ուզում են, կարող են իրենց միանձնուհի դստեր սանիկի հետ նման կապեր ունենալ:

- Այսինքն, եթե միանձնուհու ծնողներն իրենք կամենան, կարո՞ղ են այդպիսի կապ ունենալ իրենց դստեր սանիկի հետ:

- Այո՛, իրենց կամքով: Միանձնուհին չպետք է պարտադրի դա նրանց: Թող նա աղոթի, որպեսզի Աստված նրանց լուսավորի: Բայց ինչ էլ որ լինի, կնքահայրը մեծ պատասխանատվություն է կրում: Երբ ես դեռ աշխարհիկ էի, ծնողներս խոստացել էին մի ծանոթ ամուսնական զույգի, որ իրենց երեխաներից մեկի կնքահայրը մեր ընտանիքից է լինելու: Երբ նրանք երեխա ունեցան, բոլոր հարազատներս բացակայում էին, ուստի ինձ խնդրեցին դառնալ երեխայի կնքահայրը: Այն ժամանակ ես տասնվեց տարեկան էի և չէի ուզում մկրտել նրան, քանի որ զգում էի, որ ինձ վրա մեծ պատասխանատվություն եմ վերցնում: Այսպիսով, հայտնվելով դժվարին կացության մեջ՝ սկսեցի աղոթել: «Տե՛ր Աստված,- խնդրեցի ես,- եթե այդ մանկիկը բարի մարդ է դառնալու, ապա վերցրու իմ կյանքի մնացած բոլոր տարիներն ու նրան տուր: Սակայն, եթե նա վատ մարդ է դառնալու, ապա վերցրու նրան Քեզ մոտ հիմա, երբ դեռ փոքրիկ հրեշտակի է նման»: Ես մկրտեցի երեխային ու Պողոս անվանեցի: Մի շաբաթից նա մահացավ: Այժմ նա Երկնքում է և այն կորցնելու վտանգը չունի:

 

* Հյուսիսային Էպիր – հույներով բնակեցված Բալկանյան թերակղզու մաս: 1912թ.-ից Ալբանիայի տարածքի մասն է կազմում:

** Ըստ հունական պրակտիկայի, եթե չմկրտված նորածնի կյանքին անմիջական վտանգ է սպառնում՝ նրա վրա կարելի է այսպես կոչված օդային Մկրտություն կատարել: Քրիստոնյան երեխային իր ձեռքն է վերցնում և օդում երեք անգամ խաչի նշան է պատկերում, ասելով. «Մկրտվում է Աստծո ծառա (այսինչը) հանուն Հոր: Ամեն: Եվ Որդու: Ամեն: Եվ Սուրբ Հոգու: Ամեն»: Եթե նորածինը մահանում է, ապա նա մկրտված է համարվում, եթե ողջ է մնում, ապա Հույն Եկեղեցու Սինոդի որոշմամբ՝ Մկրտության Խորհուրդը կրկնվում է ամբողջությամբ:

 

Պաիսիոս Աթոսացու «Ընտանեկան Կյանք» գրքից

Ռուսերենից թարգմանությունը՝ Էմիլիա Ապիցարյանի

 

20.03.15
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․