Գրքեր

Տեր Գրիգոր քհն. Գրիգորյանի ամանորյա շնորհավորական խոսքը

Սիրելի առաքինասեր հավատացյալներ, մոտ ու հեռավոր ափերում բնակվող մեր կայքի հավատարիմ ընթերցողներ,

Շնորհավորում եմ բոլորիդ Ամանորի կապակցությամբ և հույս հայտնում, որ ձմեռային այս ցրտաշունչ օրերին ձեր սրտերը շարունակում են Տիրոջ սիրով բոցավառվել և ջերմացնել ձեզ շրջապատող մարդկանց հոգիները:

Արդեն անցյալում է ամանորյա խելահեղ գնումների մրցավազքը, զարդարված են տոնածառերը, քաղաքի փողոցներն ու տները, և մարդկանց մեծամասնությունը, մանկան պարզ ու անկեղծ ուրախությամբ սպասում է Ամանորի հեքիաթին՝ յուրաքանչյուրն իր ակնկալիքներով ու հույսերով: Վաղն արդեն հայ հյուրընկալ օջախների դռները բացվելու են սիրելիների, մտերիմների, ընկերների ու հարևանների առջև՝ միասին նշելու մանկության բույրով համեմված տոնը: Հնչելու են շնորհավորանքներ ու բարեմաղթանքներ և ես էլ միանալով բոլոր բարի խոսքերին, որ պիտի ասվեն այս տոնական օրերին, ուզում եմ հավելել, որ Տիրոջ ողորմածությամբ թող դրանք ի կատար ածվեն ի բարօրություն այն մարդկանց, ում ուղղվելու են: Թող Տեր Հիսուս Քրիստոսի ամենակարող զորությամբ գալիք նոր տարում խափանվեն չարի բոլոր որոգայթները, շուտափույթ ապաքինվեն հոգով և մարմնով հիվանդները, Սուրբ Աստվածամոր բարեխոսությամբ անզավակ ընտանիքներում մանկան քաղցր ճիչ լսվի, կարիքավորներն իրենց մեկնված հոգատար ձեռքի հանդիպեն, փորձությունների մեջ գտնվողները զորանան հավատով և համբերությամբ: Թող քրիստոնեական սիրո և ներողամտության քաղցրությամբ հարթվեն բոլոր վեճերը, վիրավորանքները մոռացվեն, խաղաղություն և միաբանություն տիրի մեր երկրում և համայն աշխարհում: Հոգևոր արևշատություն և բարեբերություն եմ մաղթում ձեզ գալիք տարում, որպեսզի ձեր հոգևոր շտեմարանները լիանան Սուրբ Հոգու քաղցրահամ պտուղներով: Եվ ամեն պարագայում, առօրյա կյանքում և տոն օրերին միշտ հիշենք, որ մենք քրիստոնյա ենք, որ քրիստոնեությունը մեր երակներով է հոսում, և Աստծո սուրբ կամքն ու Նրա Արքայությունը փնտրելը մեր առաջնահերթ ու գերագույն նպատակն է: Եվ որքան էլ սիրում ենք Նոր Տարին, որքան էլ ուրախանում ենք դրանով, չմոռանանք, որ ընդամենը մի քանի օր հետո պիտի նշենք Աստծո Որդու, մեր Տեր և Փրկիչ Հիսուս Քրիստոսի Սուրբ Ծնունդը: Ուստի, Ամանորն այնպես նշենք, որպեսզի Միածնի ծննդյան օրը գլխիկոր չմնանք:

Տիրոջ օրհնությունն ու ողորմածությունը ձեր ընտանիքներին: Շնորհավոր Ամանոր:

 

Տեր Գրիգոր քհն. Գրիգորյան

 

31.12.18
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․