Գրքեր

Տեր Գրիգոր քհն. Գրիգորյանի պատգամը նորապսակներին

Սիրելի՛ բարեպաշտ հավատացյալներ և նորապսակ զավակներ,

Սրտի ցնծությամբ շնորհավորում եմ բոլորիս Հայ Եկեղեցու լուսապայծառ տոներից մեկի՝ Տեառնընդառաջի կապակցությամբ: Մոտ երկու հազարամյակ առաջ այս օրը, երբ ընդունված կարգի համաձայն Հովսեփ Արդարն ու Սրբուհի Աստվածամայրը քառասնօրյա աստվածամանուկ Քրիստոսին Տաճար բերեցին՝ ի նշան ընծայության Աստծուն, արդար և աստվածավախ ծերունի Սիմեոնը, որին Աստված խոստացել էր, որ մահ չի տեսնելու մինչև Տիրոջ Օծյալին չտեսնի, ընդառաջ ելավ մանուկ Փրկչին, իր գիրկն առավ Նրան և գոհություն հայտնեց Ամենակալին այն բանի համար, որ արժանի եղավ տեսնելու Տիրոջ խոստումն ի կատար ածված: Համայն մարդկության Փրկիչը ծնունդ առավ Սուրբ Կույսից և փրկության լույսը պարգևեց ամենքիս: Աստվածային կատարյալ սիրո անեղ լույսը հաղթեց մահաշունչ խավարին, մաքրեց տառապած հոգիների մեղավոր ախտերը, ջերմացրեց և փրկչական լույսով լցրեց դատարկ ու մութ սրտերը: Ահա այս աստվածային սքանչելի լույսն է, որ այսօր վերցնում ենք եկեղեցիներից և մեր սրտերի կանթեղներում վառած, մեր տներն ենք շտապում, որպեսզի դրա պարգևած կենարար շունչն ու զորեղ ոգին րոպե առաջ մեր հարազատներին ու մերձավորներին փոխանցենք: Եվ քանի որ Հայ Առաքելական Սուրբ Եկեղեցին այս օրը հռչակել է նաև նորապսակների օրհնության օր, ապա ջերմագին շնորհավորանքներս եմ հղում բոլոր նորապսակ զույգերին և աղոթում առ Երկնավոր Բարեգութ Հայր, որպեսզի Իր օրհնաբեր սիրո ճաճանչներն իրենց շողերն արձակեն ձեր նորաթուխ ընտանիքներից ներս և բարեբեր ծիլեր տան ապագա միասնական կյանքի համար: Թող Հիսուս Քրիստոսի անձնազոհ սերն անմար օրինակ լինի ձեզ համար՝ համբերություն և խոնարհություն պարգևելով դժվարության պահին, օգնի հաստատուն մնալու ձեր տված խոստումներին և պատվով տանելու համատեղ կյանքի քաղցրություններն ու դառնությունները: Թող ձեր սրտերում աճեցրած աստվածային սերը միշտ գերիշխող լինի մնացյալ զգացումների վրա և ձեր հայացքներն ուղղի դեպի գերագույն նպատակ ու փրկություն՝ Տեր Հիսուս Քրիստոս: Ապրե՛ք Քրիստոսով, սիրե՛ք Քրիստոսով և թող Բարձրյալի Ամենախնամ Աջը պահապան լինի ձեզ և ձեր ընտանիքներին: Ամեն:

 

Տեր Գրիգոր քհն. Գրիգորյան

Զորավոր Սուրբ Աստվածածին Եկեղեցու Հոգևոր Հովիվ

13.02.17
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․