Գրքեր

Ընտրությունը

Կար-չկար մի գետ: Լեռներից իջավ, անտառի մեջ քչքչաց, մարգագետնով սահուն անցավ ու հասավ անապատին: Այստեղ մտածմունքի մեջ ընկավ, թե ինչպես անցնի շիկացած անապատի միջով: Եվ որոշեց արևին հարցնել.

- Դու վերևից լույս ես տալիս և ամեն ինչ տեսնում ես: Կկարողանա՞մ արդյոք անապատը հաղթահարել:

- Չես կարող: Կչորանաս: Իմ ճառագայթներն այնտեղ այրում են անխնա: Անապատը մահ է գետի համար:

Այդժամ որոշեց գետը քամուն հարցնել.

- Դու արագընթաց ես, սուրում ես, ուր կամենաս: Ամեն ինչ տեսել ես, ամեն բան գիտես: Ասա՛, գեթ մի գետի հաջողվե՞լ է անապատի միջով անցնել:

- Ես անապատում գետերի ցամաքած հուներ եմ տեսել,- պատասխանեց քամին:- Ոչ մի գետի չի հաջողվել անապատը կտրել-անցնել: Անապատը գետի համար մահ է:

Կրկին մտահոգվեց գետը, և հանկարծ մի սև օձ սողալով մոտեցավ նրան.

- Գիտեմ,- ֆշշացրեց նա,- թե ինչպես կարելի է ցանկությունդ կատարել: Մահացիր և կանցնես անապատի միջով: Թույլ տուր թունավորեմ ջրերդ և ո՛չ արևը, ո՛չ քամին մոտ չեն գա դրանց: Եվ այդ կերպ մեռյալ ջրերը կկտրեն-կանցնեն անապատը:

Բայց գետը որոշեց.

- Եթե պիտի մեռնեմ, ապա ավելի լավ է լուսավոր արեգակի ճառագայթներից, քան սև օձի թույնից:

Եվ իր որոշումը կայացնելով՝ սկսեց հալչել արևի ճառագայթների տակ՝ փոխվելով ճերմակ ամպի: Իսկ քամին նրան քշելով հասցրեց անապատի մյուս ծայրը, որտեղ ամպը անձրևի վերածվեց: Անձրևաջրերը միավորվելով հոսանք դարձան և գետը շարունակեց իր ընթացքը:

Ամեն ինչ ընտրությունից է կախված…

 

Ռուսերենից թարգմանությունը՝ Էմիլիա Ապիցարյանի

28.10.23
ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․