Քահանաներ Ծխական խորհուրդ Տիկնանց միություն Երիտասարդաց միություն Ցերեկային կենտրոն 
Քրիստոնյա ընտանիք Հարցազրույցներ Ուխտագնացություն Սոցիալական ծառայություն
Զորավոր Սբ. Աստվածածին եկեղեցին շարունակում է սիրո առաքելության իր ուղին
ԱՀԹ առաջնորդական փոխանորդ Գերաշնորհ Տ. Նավասարդ արք. Կճոյանի օրհնությամբ, Զորավոր Սբ. Աստվածածին եկեղեցու համայնքը, այցելելով կարիքավոր ընտանիքներին, շարունակում է սիրո առաքելության իր կարևոր ուղին՝ վայելելով աստվածային ներկայության երանությունը: Քանի որ, Սբ. Հովհաննես առաքյալի խոսքի համաձայն, աստվածային սիրո մեջ գտնվողը միանում է Աստծուն, Աստված էլ՝ իրեն (Ա Հովհաննես 4:16):
Սիրո առաքելության ուղին այս անգամ՝ հուլիսի 13-ին, համայնքին, հոգևոր հովիվ Տեր Գրիգոր քահանա Գրիգորյանի գլխավորությամբ, առաջնորդեց դեպի Էջմիածին քաղաք:Մովսես Խորենացու 4/4 հասցեում վարձակալությամբ ապրող Գաբրիելյան ընտանիքի համար սոցիալական խնդիրներն ինչ-որ չափով աննշան են այն մեծ խնդրի առջև, որ ունեն իրենք. ընտանիքի երեք զավակները տառապում են պարբերական՝ երևանյան հիվանդությամբ: Գաբրիելյան Սվետլաննան՝ ընտանիքի մայրը (37 տ.), նշեց, որ ամուսինը ստիպված է եղել մեկնելու արտագնա աշխատանքի, թեև նա էլ առողջական խնդիրներ ունի և մի քանի անգամ վիրահատվել է: «Ես էլ եմ աշխատում, բայց իմ և ամուսնուս վաստակած գումարի մեծ մասը և ընտանեկան նպաստը հիմնականում հատկացնում ենք երեխաների բուժմանը վերաբերող խնդիրները մասամբ լուծելուն, իսկ մնացած գումարը չի բավարարում տան վարձի, կոմունալ և ամենօրյա ծախսերը հոգալուն»,- ասաց Սվետլաննան:
Տեր Գրիգորի հետ զրույցը գոտեպնդեց ընտանիքի երիտասարդ մորը: «Աստծուն հուսալով շարունակեք ապրել ձեր կյանքը լավատեսորեն՝ այդ կերպ օգնելով և՛ ձեզ, և՛ ձեր ընտանիքին, գտնելու համար հոգևոր անանցանելի ուրախությունը: Փոփոխվող այս աշխարհում մարդու համար հաստատուն և ամուր հենարանն Աստված է և ինչպես սաղմոսերգուն է ասում. «Աչքերս դեպի լեռները բարձրացրի, որտեղից ինձ օգնություն պիտի գա: Ինձ օգնություն պիտի գա Տիրոջից, որ ստեղծեց երկինքն ու երկիրը»» (Սաղմոս 120:1-2),- ասաց Տեր Գրիգորը:
Ապա, բժշկության աղոթք կարդալուց հետո, Տեր Հայրն ընտանիքին հանձնեց ամերիկաբնակ Կարեն Վարդանյանի աջակցությամբ գնված սննդի փաթեթներն ու հիգիենիկ պարագաները, իսկ ընտանիքի մայրն իր երախտագիտությունը հայտնեց Տեր Գրիգորին, համայնքին և աջակից անձին՝ իրենց ընտանիքի հանդեպ ցուցաբերած ուշադրության և հոգածության համար:
Կարինե Սուգիկյան
