Գրքեր
Հարց 30 - Քանի՞ ձևով է մահանում մարդ:

Պատասխան – Մարդը կյանքից հեռանում է չորս տեսակի մահով. բնական, պատահական, անձնիշխանական և նախախնամական:

Բնական մահը ծերության մահն է, երբ թուլանում է զգայարանների զորությունը, չորս տարրերի բաղադրությունը՝ զատվում, իսկ հոգին բաժանվում է մարմնից. ինչպես Աբրահամի, Իսահակի, Հակոբի և այլոց մահը, որոնց մասին Սուրբ Գիրքն ասում է. «Ալևոր և լեցուն օրերով մեռան և միացան իրենց հորը»:

Պատահական մահը փորձանքով է վրա հասնում՝ գազաններից, գետերից, քարերից և այլնից, որոնք Աստծո թողտվությամբ են մարդուն պատահում:

Անձնիշխանական մահը երկու կերպ ունի՝ բարի և չար: Բարին մարտիրոսաց մահն է, երբ անձնիշխանական կամքով իրենց պատարագում են Աստծո սիրո համար: Նրանք թեպետ մարմնով մեռնում, սակայն հոգով կենդանանում են: Չար մահը նման է Աքիտոփելի և Հուդայի մահվանը: Ովքեր իրենց սպանում են, մեռնում են հոգով ու մարմնով և համարվում են անձնասպան ու Աստծուն հակառակ:

Նախախնամական մահը շատ պատճառներով է լինում: Աստված անզեղջ մեղավորին մահ է տալիս, որպեսզի մեղքը չշատանա: Կամ որպես մեղքերի պատիժ՝ անժամանակ մահ է տալիս նման մարդուն: Եվ կամ երբ մեկն արդար է, բայց ճգնությամբ նեղության մեջ է գցում իր անձը, Աստված այդպիսի մարդուն մահ է տալիս, որպեսզի հանգստանա, քանզի նրա համար մահը հանգիստ է: Կամ եթե Աստված պատժելու լինի մի երկրի, նախ արդարին է մահվամբ վերցնում, որ մեղավորների հետ չպատժվի կամ նրանց համար աղաչանք չանի: Մահ է տալիս մանուկներին, որ չմեծանան և մեղքով շաղախվեն, այլ անմեղ մահանան, և իրենց ծնողների չարություններին անհաղորդ մնան, և կամ ծնողները նրանց մահվան կսկիծով խրատվեն:

Թողնենք այլակերպ պատճառները, որոնք միայն Աստծուն են հայտնի: Մենք այսքանը գիտենք, որ Աստծո խնամքը բարի է և բարիք է անում, չարը չի կամենում: Թեպետ մեզ չար է թվում թե՛արդարների և թե՛ մեղավորների մահը, որովհետև անզգամներին թվում է, որ արդարը մեռավ, բայց արդարների հոգին խաղաղության մեջ է՝ ըստ Սողոմոնի: Երբ մեռնում է մեղավորը, դադարում է մեղք գործելուց, ինչը ևս բարի է:

ԲաԺանորդագրվել
Ընթերցել նաև
Օրհնությամբ ՝ ԱՀԹ Առաջնորդական Փոխանորդ Տ․ Նավասարդ Արքեպիսկոպոս Կճոյանի
Կայքի պատասխանատու՝ Տեր Գրիգոր քահանա Գրիգորյան
Կայքի հովանավոր՝ Անդրանիկ Բաբոյան
Web page developer A. Grigoryan
Բոլոր իրավունքները պաշտպանված են Զորավոր Սուրբ Աստվածածին եկեղեցի 2014թ․