«Առաքինության աստվածային լարերը երբեք չեն լռում»

«Տաճարը ոչ միայն հոգու բարձր թռիչքների, վեհ կրոնական զգացմունքների վայր է, այլ նաև մի տեղ, ուր մեր հոգին տրամադրվում է առաքինի գործեր հանդես բերելու: Արարիչը դրել է հոգու մեջ առաքինության աստվածային լարեր, որոնք երբեք չեն լռում: Այդ աստվածային լարերը մեր խիղճն է, որ անդադար պահանջում է քրիստոնեական առաքինությունները մարմնացնել կյանքի մեջ»,- ասել է հայոց հայրապետներից Գևորգ Զ Չորեքչյանը:

Բոլոր ժամանակներում Հայ Առաքելական Սուրբ եկեղեցու բարենորոգության և կենդանության միակ աղբյուրը հանդիսացել է գործնական քրիստոնեությունը: Փրկչի խոսքի համաձայն՝ առայսօր Հայ եկեղեցին քայլում է սիրո և կարեկցության ճանապարհով՝ քրիստոնեական առաքինությունների լույսն ու ջերմությունն ամենուր տարածելով: Սիրո ճամփորդներն ամենուր ի չիք են դարձնում անտարբերությունը: Նրանց կյանքում քրիստոնեական հավատն ու քրիստոնեական կյանքը անբաժան են միմյանցից: Այդ ճամփորդների շարքում սիրո առաքելության բարձր գիտակցությամբ իրենց ճանապարհն են անցնում նաև Զորավոր Ս. Աստվածածին եկեղեցու համայնքն ու հոգևոր դասը:

Փետրվարի 3-ին Զորավոր Ս. Աստվածածին եկեղեցու համայնքը, հոգևոր հովիվ Տեր Գրիգոր քահանա Գրիգորյանի գլխավորությամբ, այցելեց Միրզոյան ընտանիքին, որ բնակվում է Երևանի Շիրակի 20/23 հասցեում: Սոցիալապես անապահով ընտանիքը բաղկացած է հինգ հոգուց: Այժմ ընտանիքի կարիքները փորձում է մասամբ հոգալ ընտանիքի մայրը՝ Սաթենիկ Մարտոյանը (35 տ.), ով մանկապարտեզում որպես դայակ է աշխատում: Ընտանիքի մայրը նշեց, որ իր աշխատավարձի և սկեսուրի հաշմանդամության գումարները չեն բավարարում անգամ իրենց ընտանիքի նվազագույն կարիքները հոգալու համար: Սաթենիկի ամուսինը և սկեսուրն անկողնային հիվանդներ են: «Ամուսինս տասնմեկ տարի առաջ ծնոտի և ոտքի կոտրվածքներ է ստացել, տասնմեկ վիրահատություն տարել, սակայն տարեցտարի մեծ բարդություններ են առաջացրել նրա մոտ: Այժմ ամուսնուս մոտ թրոմբոզ վիճակ է, և ոտքը սկսել է սևանալ: Իսկ սկեսուրս շաքարային դիաբետ ունի, նրա մոտ ևս թրոմբներ են առաջացել, ոտքերը վերքոտվել են՝ գանգրենայի վտանգ ստեղծելով: Գումար չունենալու պատճառով նրանք չեն կարողանում պարբերաբար բուժումներ անցնել և օր օրի նրանց վիճակն ավելի է վատանում: Շատերին եմ դիմել օգնության, բայց՝ ապարդյուն: Արդեն ամսվա կեսից երկու անչափահաս աղջիկներս նայում են ձեռքիս, թե ինչ պետք է պատրաստեմ ուտելու»,- ասաց Սաթենիկը:

Տեր Գրիգորը բժշկության աղոթք կարդաց ընտանիքի համար և նրանց հանձնեց դրամական օգնություն (100 ԱՄՆ դոլար), որ տրամադրել էր սփյուռքահայ անանուն մի բարերար իր առաջին թոռնիկի՝ Լորին Մարիի ծննդյան առթիվ, նաև սննդի փաթեթ՝ եկեղեցու համայնքի կողմից տրամադրած:

Միրզոյան ընտանիքն անչափ երախտապարտ էր Զորավոր Ս. Աստվածածին եկեղեցու համայնքին, Տեր Գրիգորին և աջակից անձին՝ իրենց ընտանիքին օգնության ձեռք մեկնելու համար:

Կարինե Սուգիկյան